Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров бо Президенти Чехия Милош Земан мулоқот анҷом дод. Дар мулоқот масъалаҳои таҳкими муносибот байни Ҷумҳурии Тоҷикистон ва Ҷумҳурии Чехия дар соҳаҳои иқтисодӣ, иҷтимоӣ, энергетика, саноат, фарҳанг мавриди баррасӣ қарор гирифтанд. Тибки иттилои котиби матбуотии Мачлиси намояндагон Мухамадато Султонов Раиси Маҷлиси намояндагони Маҷлиси Олии Ҷумҳурии Тоҷикистон сафари расмии Президенти Ҷумҳурии Чехияро ба кишвари моро омили асосӣ ва тақвиятбахши ҳамкориҳои Душанбе ва Прага дар ҳамаи арсаҳо маънидод кард ва изхори бовари намуд, ки сафари расмии Милош Земан ба Тоҷикистон ба густариши минбаъдаи робитаҳои ду кишвари дӯст такони тоза мебахшад. Имсол, гуфт Шукурҷон Зуҳуров аз замони барқарори муносиботи дипломатӣ байни Ҷумҳурии Тоҷикистон ва Ҷумҳурии Чехия зиёда аз 20 сол сипарӣ шуд ва аз он замон то имрӯз байни кишварҳои мо як муносибати хеле дӯстона ва самимӣ ҷараён дорад, ки ин равобит самараи худро тайи ин солҳо аллакай додааст. Ш. Зуҳуров таъкид намуд, ки кишвари Чехия дар ин миён ба дастовардҳои назарраси сиёсӣ, иқтисодӣ, иҷтимоӣ ва илмиву техникӣ ноил шудааст, ки нишонаи заҳмату талошҳои миллати Чех таҳти роҳбарии Шумо ҷаноби Милош Земан мебошад. Ҳамкориҳои дуҷонибаи Ҷумҳурии Тоҷикистон бо Ҷумҳурии Чехия дар чаҳорчӯбаи муносиботи сиёсӣ, иқтисодӣ ва илмӣ – техникӣ асос ёфта, дар сояҳои дӯстӣ раванди рӯ ба инкишофро касб кардааст. Ин равобит дар рӯҳияи боварии байниҳамдигарӣ чӣ дар сатҳи дуҷониба ва чӣ дар сатҳи бисёрҷониба сурат мегирад, ки барои ҳарду тараф манфиатбахш мебошад.
Дар ин бора jahonnamo.tj иттилоъ додааст.
Нет комментариев