Шахси бемор метавонад 10-15 нафари дигарро сироят намояд

0
200 просмотров

Бемории сил аз қадимулайём ҳамчун бемории сирояткунанда маълум буда, аз шахси бемор ба одами солим бо воситаи ҳаво ва қатраҳои туф сироят мекунад. Ҳангоми сулфа, атса задан, туф кардани балғам ва сухан кардани шахси бемор ба муҳити атроф қатраҳое хориҷ мешаванд, ки дар онҳо андозаи зиёди барангезандаҳои бемории сил мавҷуданд. Шахси солим аз ин ҳаво нафас кашида, метавонад сироят ёбад. Сил бемории ирсӣ ё авлодӣ намебошад.
Бемории силро бемории иҷтимоӣ ҳам меноманд, зеро он дар байни оилаҳои ниёзманд зиёдтар дучор мешавад ва дар айни замон яке аз проблемаҳои глобалӣ буда, ҳалли таъҷилии худро мехоҳад.
Духтури оилавии Маркази саломатии рақами 4-уми шаҳри Хуҷанд Муқаддас Юсуфова дар сӯҳбат бо мо гуфт, ки Сил сарфи назар аз табобатшаванда буданаш ва дастрас будани усулҳои муоина ва табобати самаранок, дар тамоми ҷаҳон паҳн гаштааст. Ин беморӣ асосан ҳаёти шахсони аз 15 то 49-соларо зери хатар мегузорад ва соле дар рӯи дунё то 9 миллион нафар аҳолии гирифтори ин беморӣ аз худ дарак медиҳанд, тақрибан 3 миллиони онҳо вафот мекунанд.

Дар ҳисоботи мутахассисони Ташкилоти умумиҷаҳонии тандурустӣ (ТУТ) оварда шудааст, ки дар Тоҷикистон ҳам маризони гирифтори бемории сил ҳастанд, бархе аз онҳо ба шакли мутобиқгаштаи бемории сил гирифтор мебошанд. Ин албатта аз паст будани сатҳи маърифати тиббию санитарии аҳолии кишвар, ноогоҳи онҳо дар бораи ин беморӣ ва сари вақт ба духтурони оилавӣ муроҷиат накардан гувоҳӣ медиҳад.
Дар Ҷумҳурии Тоҷикистон Барномаи миллии ҳимояи аҳолӣ аз бемории сил барои солҳои 2016-2020 қабул шудааст. Инчунин Тоҷикистон узви Созмони байналмилалии мубориза бар зидди бемории сил буда, дурнамо, ҳадаф ва мақсади давлатҳои дигарро дар ин самт эътироф менамояд. Барномаи мазкур аз ҷониби Ҳукумат ва ташкилотҳои байналмилалӣ дастгирии ҳаматарафа ёфта, тадриҷан дар тамоми ҷумҳурӣ амалӣ мешавад.
Сил бемории сироятист ва барангезандаи он микробактерияи сил мебошад. Онро олими немис Кох кашф намудааст ва дар байни мутахассисони тиббиёт ҳамчун «чӯбчаи Кох» маъмул аст.

Ба нишонаҳои ибтидоии сил эътибор диҳед, ки он аз дигар нишонаҳои ибтидоии роҳи нафас фарқи зиёде надорад.
Нишонаҳои ибтидоии ин беморӣ ба зуком ва дигар илтиҳоби роҳи нафаскашӣ шабоҳат дорад: пайдо шудани сулфа, ҷудошавии балғам, арақкунии шабона, харобшавӣ (лоғарӣ), баланд шудани ҳарорати бадан, лакотӣ мебошад.
Агар ин нишонаҳо аз 2 ҳафта зиёд давом дошта бошанд, фавран ба духтури оилавии худ муроҷиат намоед. Духтури оилавӣ шуморо барои ташхис ба таҳлили микроскопии 3 каратаи балғам равон мекунад, – мегӯяд Муқаддас Юсуфова.

Ҳангоми сари вақт ба духтури оилавӣ муроҷиат намудан ва табобат гирифтан, шахси бемор зуд шифо меёбад, яъне бемории сил табобатшаванда аст. Давраи табобат бетанаффус дар зери назорати кормандони тиб 6-8 моҳ давом мекунад. Агар табобат аз рӯи талаботи замонавӣ гузаронида шавад, ба шифоёбии бемор пурра кафолат дода мешавад. Табобати ҳамаи марҳилаҳо ройгон мебошад.
Барои сари вақт пешгирӣ намудани бемории сил ҳар як шахси солим бояд ҳар сол як маротиба аз муоинаи рентгенӣ-флюографияи қафаси сина гузарад.
Духтури оилавии Маркази саломатии рақами 4-уми шаҳри Хуҷанд Муқаддас Юсуфова дар идомаи мусоҳиба илова кард, ки шахси бемор ҳангоми табобат, асбобу лавозимоти истифодабурдаашро аз ашёҳои истифодабарандаи хонадон ҷудо намояд. Косаю табақ, дастпоккун ва рахти хобро бо маҳлули хлорнок бояд тоза кард. Хонаи истиқоматии худро тез-тез шамол дода, ҳавои онро тоза кардан зарур аст. Кӯдакон бояд дар назди бемор набошанд.

Дар хотир бояд дошт, ки ҳар шахси бемори сил ҳаноми табобат накардан, дар як сол метавонад 10-15 нафари дигарро сироят намояд. Барои роҳ надодан ба чунин ҳодиса, бемор бояд аз рӯи тавсияи табиб амал карда, мӯҳлати муолиҷаро риоя намояд ва пурра шифо ёбад. Дар ҳолати ба охир нарасонидани табобат беморӣ метавонад аз нав хурӯҷ карда, ба шакли мутобиқгаштаи бемории сил гирифтор шавад. Аз ин рӯ пешгирии саривақтӣ беҳ аз табобати ҳамешагӣ аст.

Нет комментариев

Также рекомендуем