Шиносоии Раиси вилоят бо ҷараёни бунёдкориҳо дар шаҳри Исфара

0
179 просмотров

Раиси вилояти Суғд Абдураҳмон Қодирӣ ба шаҳри Исфара сафари корӣ анҷом дода, бо ҷараёни корҳои ободонӣ шинос гардид.

Абдураҳмон Қодирӣ дар маркази шаҳри Исфара бо нақшаи ободонӣ ва намунаи ниҳолҳои ороишие, ки мақомоти иҷроия ва соҳибкорон барои сабзгардонии хиёбону роҳравҳо ва саҳни ташкилоту муассисаҳо тасмим гирифтаанд, шинос шуд ва бо шинонидани ниҳол сокинони шаҳрро барои вусъати корҳои баҳорӣ ҳидоят намуд. Вобаста ба ин, имрӯзҳо ҷиҳати зебову назаррабо гардонидани кӯчаву хиёбонҳои шаҳр маъракаи шинонидани ниҳол оғоз шудаву идома дорад ва то охири мавсим садҳо бех ниҳолҳои ҳамешасабзу ороишӣ ҳусни шаҳрро афзун хоҳанд намуд.

Корҳои ободонӣ дар осоишгоҳи “Зумрад”-и шаҳри Исфара низ ҷараён доранд. Бо иқдоми соҳибкори ватанӣ таъмиру тармими биноҳои истироҳатию табобатӣ, саҳн ва ҳудуди осоишгоҳ имрӯз мавриди азнавсозӣ қарор гирифта, ҳамзамон бунёди меҳмонхона, ҳавзҳои истироҳатию солимгардонӣ ва дигар иншооти зарурӣ дар ҳудуди он ба нақша гирифта шудаанд. Осоишгоҳи “Зумрад” калонтарин маркази истироҳатию солимгардонии серсоҳаи ҷумҳурӣ буда, дар тӯли мавҷудияти худ берун аз кишвар низ шуҳрати зиёд ба даст овардааст. Дар ин осоишгоҳ ҳамасола беш аз 10 ҳазор нафар шаҳрвандони ҷумҳурӣ ва хориҷа саломатии хешро барқарор менамоянд. Раиси вилоят зимни шиносоӣ бо корҳои бунёдкорӣ ба масъулин тавсия дод, ки ободонии ҳудуди осоишгоҳ ба таври лозима ба роҳ монда шавад. Инчунин зимни сафар ба шаҳри Исфара Раиси вилояти Суғд Абдураҳмон Қодирӣ аз корхонаи коркарди меваи хушк – ҶДММ “Баракат-Исфара” низ боздид ба амал овард. Корхонаи “Баракат-Исфара” ашёи хом, яъне навъҳои гуногуни хушкмеваро аз хоҷагидорон ва бозорҳои дохила гирифта, пас аз коркарду бандубаст онҳоро дар шакли маҳсулоти тайёр асосан ба давлати Россия ва Аврупову Амрико содирот мекунад. Раиси вилоят роҳбарияти шаҳрро тавсия дод, ки бештар ба парвариши навъҳои бозоргири меваҳо, аз ҷумла зардолу дар ин минтақа эътибор диҳанд, зеро меваҳои хуштамъу хушсифати диёри мо дар хориҷаи дуру наздик талабгорони зиёд доранд. Роҳбарияти корхона ният дорад дар ояндаи наздик доираи фаъолияташро васеъ намуда, иқтидори истеҳсолиашро ба коркарди 4 тонна хушкмева дар як шабонарӯз расонад ва шумораи коргаронашро низ зиёд намояд.

 Манбаъ: Хадамоти матбуоти Раиси вилояти Суғд

Нет комментариев

Также рекомендуем