Чӯткаи дандоншӯиро ҳанӯз дар асри 15 хитоиҳо ихтироъ кардаанд. Айнан худи ҳамон вақт он ба Аврупо аз тарафи саёҳатчиён оварда шуда буд. Чӯткаи дандоншӯӣ намуди зеринро дошт: ба таначӯби растании бамбук ё устухони борики ягон ҳайвон пашми зери гардани хукро сахт мекарданд. Дар замонҳои ҳукмронии Иван Грозный бошад, дар Русия пас аз таом чӯбчаҳои дар охирашон пашм сахткардашударо истифода мебурданд. Пётри I ба ҳамаи дарбориёнаш фармон дода буд, ки дандонҳои худро ҳатман бо бӯри талқоншуда ва матоъпораи нам тоза кунанд. Чӯткаи сунъӣ дар соли 1938 пас аз ихтирои нейлон пайдо гашт. Чӯткаи сунъӣ тез хушк шуда, дар он бактерияҳо намеафзуданд. Лек, чӯткачаҳои аз нейлон сохташуда бисёр сахт буда, милкҳоро мехарошиданд. Соли 1950 ширкати «Дюпон» технологияи истеҳсоли чӯткаҳои дандонтозакуниро такмил дода, мӯйчаҳои нейлонии чӯткаро мулоимтар намуд.
Дар замони мо чӯткаҳои дандоншӯии ширкатҳои дар ҷаҳон машҳур «Аквафреш, Колгейт, Рич, Бленд-а-мед, Лакалют, Орал-би»-ро истифода мебаранд. Онҳо ба стандарти ҷаҳонӣ мутобиқ буда, сифати хуб ва намуди зебо доранд, инчунин аз тарафи духтурони дандон эътироф карда шудаанд.
Мехоҳед, чӯткаи дандоншӯӣ ба сирри дандонатон осеб нарасонад? Пас, ҳангоми харидорӣ намудан ба ҷойгиршавии мӯякҳои чӯтка эътибор диҳед. Онҳо бояд аз якдигар дар масофаи якхела ҷойгир шуда бошанд. Чӯткаи дандоншӯӣ бо мӯякҳои мулоимро, бачагон ва шахсони милкашон дардманд, чӯткаи дандоншӯӣ бо мӯякҳои сахтро, дӯстдорони қаҳва, тамоку ва чой истифода бурданашон мумкин аст. Ба ақидаи духтурон дандонҳоро ду маротиба дар як рӯз, яъне саҳарӣ ва бегоҳӣ пас аз истеъмоли таом дар муддати панҷ дақиқа тоза кардан ҳатмист. Харакатҳои чӯткаи дандоншӯӣ бояд аз поёни дандон ба боло равона карда шуда бошанд, то ки дандон пурра аз боқимондаҳои таом тоза гардад.
Нет комментариев