Дар доираи саёҳати иттилоотӣ журналистони АМИТ «Ховар», телевизионҳои «Тоҷикистон», «Сафина», «Ҷаҳоннамо» ва маҷаллаи «Иқтисодчӣ» 18 июл бо фаъолияти як зумра корхонаҳои Минтақаи озоди иқтисодии «Суғд», барномаҳои корию тарҳрезишуда, раванди истеҳсолот ва технологияҳои нави корхонаҳо аз наздик шинос шуданд. Пресс-тур аз ҷониби Вазорати рушди иқтисод ва савдои Ҷумҳурии Тоҷикистон бо мақсади шиносоӣ бо натиҷаи фаъолият ва дастовардҳои корхонаҳои минтақа ташкил карда шуд.
Тавре хабарнигори АМИТ «Ховар» Мавҷуда АНВАРӢ аз ҷараёни шиносоии рӯзноманигорон иттилоъ медиҳад, таваҷҷуҳи журналистонро беш аз ҳама фаъолияти ҶСК «Ариана Металл Пласт», ки дар он асосан истеҳсоли бозичаҳо, дучархаҳои бачагона ва таҷҳизоти маишӣ ба роҳ монда шудааст, ҷалб намуд. Ин корхонаи истеҳсоли бозичаҳо моҳи октябри соли 2018 бо иштироки Пешвои миллат муҳтарам Эмомалӣ Раҳмон мавриди баҳрабардорӣ қарор гирифта буд.
Дар айни ҳол дар корхона истеҳсоли 36 намуд молҳои саноатии ҷавобгӯ ба талаботи муосир ва рӯзмарраи ҳаёти бачагон, аз қабили дучарха, сечарха, фойтунча, аробачаҳо, мошинчаҳо ва ғайраҳо ба роҳ монда шудааст. Корхона 8 хати истеҳсолӣ дошта, 70 фоизи кормандонро занони маҳаллӣ ташкил медиҳанд. Ба иттилои директори корхона Дилором Умарова, дар шашмоҳаи аввали соли 2019 ба маблағи 8 млн. сомонӣ маҳсулот истеҳсол шуд.
«Мо нақша дорем, ки маҷмӯи маҳсулоти саноатии худро дар 1 сол ба беш аз 20 млн. сомонӣ расонем. Дар баробари таъмини бозори дохилӣ, инчунин ният дорем содироти маҳсулоти хешро ба хориҷи мамлакат, аз ҷумла ба Россия ва Озарбойҷон ба роҳ монем. Ҳамчунин дар нақша аст, ки маҳсулоти гуногуни пластикӣ истеҳсол намоем»,-гуфт Дилором Умарова.
Ба нақли номбурда, бо мақсади истеҳсоли маҳсулоти дар бозор рақобатпазир ва аз лиҳози экологӣ безарар бо харҷи зиёда аз 6 миллион сомонӣ технологияи корхонаро аз бонуфузтарин ширкатҳои ҷаҳонӣ харидорӣ намудаанд. Мунтазам ҳамаи коргарону мутахассисон ба курсҳои омӯзишӣ фаро гирифта мешаванд.
Иттилоъ дода шуд, ки дар ин корхона кор дар ду баст ба роҳ монда шуда, ашёи хом қисман аз хориҷи ҷумҳурӣ, аз ҷумла аз Федератсияи Россия, Чин, Қазоқистон ва Ӯзбекистон ворид мегардад ва ба таъкиди мутахассисон, дар мамлакат ин аввалин корхонае ба ҳисоб меравад, ки тамоми қисмҳои бозичаҳо, дучархаҳои бачагона ва дигар таҷҳизоти маишӣ дар дохил истеҳсол карда мешаванд. Мавриди зикр аст, ки маҳсулоти дар корхона истеҳсолшаванда аз ҷиҳати экологӣ тоза ва воридотивазкунанда буда, он дар миқёси мамлакат аввалин корхонае маҳсуб меёбад, ки дар он дучарха ва бозичаҳои гуногун барои кӯдакон истеҳсол мегарданд.
Дар идома журналистон бо фаъолияти корхонаҳои Ассотсиатсияи сохтмончиён ва коркарди чӯбу тахтаи «Кедр», ки асосан ба истеҳсоли маҳсулоти сохтмонӣ машғуланд, шинос шуданд.
Намояндагони ВАО-и мамлакат ба фаъолияти корхонаи муштараки «Силкоат бойя»-и Тоҷикистону Туркия таваҷҷуҳи махсус зоҳир карданд. Дар ин корхона рангу бор ва андоваҳои минералӣ истеҳсол гардида, зардеворҳои моеъ ва омехтаҳои хушки сохтмонии он зиёда аз даҳ сол боз дар Тоҷикистон бо сифати баланд маъмул гардидаанд. Имрӯз ин корхона қариб 120 намуд маҳсулот манзури бозори сохтмонӣ гардонидааст. Ашёи хоми корхонаи мазкур аксаран ватанӣ буда, аз маъданҳои минтақаҳои Варзобу Ванҷ истифода мешаванд. Хусусияти асосии маҳсулоти ин корхона он аст, ки аз маводи кимиёвии зарарнок орӣ буда, аз худ бӯи ғализ ё зараровар ҷудо намекунанд.
Рангҳои сохтмонӣ, ки «Силкоат Бойя» истеҳсол мекунад, бидуни истифодаи маҳлулҳои химиявӣ аз об ва маҳлулҳои табиӣ тавлид мегарданд. Ин рангҳо ҷилодор буда, намӣ ва об намегузаронанд. Маҳсулоти дигари корхона маводи муҳофизатии бинокории декоративӣ аз сангҳои табиӣ ва мармар, масолеҳи андоваю пардози деворҳои дарунӣ ва берунии иншоот аст.
Хотирнишон месозем, ки маҳсулоти корхонаи муштараки «Силкоат бойя» на фақат дар бозори дохилии Тоҷикистон, балки дар бозорҳои кишварҳои ҳамсоя, аз қабили Афғонистон, Қирғизистон ва Қазоқистон низ харидори зиёд доранд. Аз ин лиҳоз роҳбарияти корхонаи мазкур ният дорад, ки дар баробари кишварҳои Осиёи Марказӣ маҳсулоташро ба Федератсияи Россия содир намояд. Дар айни ҳол барои роҳ ёфтан ба бозорҳои Федератсияи Россия гуфтушунид ҷараён дорад.
Инчунин намояндагони ВАО ба корхонаи истеҳсоли тирезаҳои пластикии «Равзана Пластик» рафтанд. Директори корхона Илҳом Сангинов дар бораи таърихи яке аз корхонаҳои аввалини МОИ «Суғд» нақл кард. Имрӯз ин корхона маҳсулоти босифати худро дар бозори дохилӣ таҳти унвони «MANZIL» ба фурӯш гузоштааст.
Нуқтаи охирини пресс-тур ҶДММ «Арча» ва «Арча-Мебел», ки ба истеҳсоли маҳсулоти чӯбӣ ва мебел барои иншооти маъмуриву таълимӣ ва иҷтимоиву маданӣ машғул аст, қарор гирифт. Журналистон аз маҷмааи намоишии ин корхонаҳо, ки дар он намудҳои зиёди маҳсулот, аз ҷумла дарҳои байниҳуҷравӣ, тирезаҳои миллӣ ва стандарти аврупоӣ, фаршу мебел барои муассисаҳои таълимӣ, тиббӣ, маишӣ, истироҳатгоҳҳову корхонаҳо ба фурӯш гузошта шуда буд, дидан карданд. Муовини роҳбари ассотсиатсия Нарзулло Дадобоев ба рӯзноманигорон дар бораи фаъолият, рушди корхона ва нақшаҳои оянда ибрози назар намуд.
Ёдовар мешавем, ки соли 2008 бо мақсади ҷалби бештари сармоя ба соҳаи коркард ва истеҳсоли маҳсулоти саноатӣ дар вилояти Суғд минтақаи озоди иқтисодӣ таъсис дода шуд, ки ҳоло дар он 26 субъект фаъолият мекунад. Тибқи ҳисоботи омории охирин, 13 корхонаи он ба фаъолияти истеҳсолӣ, хизматрасонӣ, савдо ва боқимонда субъектҳо ба корҳои сохтмонӣ, ворид намудани таҷҳизот, ба кор андохтани иқтидорҳои нав ва корҳои ободонӣ машғул мебошанд. Дар МОИ «Суғд» аз оғози фаъолият то имрӯз дар маҷмӯъ 565 ҷойи корӣ таъсис дода шудааст.
Манбаъ: АМИТ «Ховар»
Нет комментариев