Суғд рӯзнома надорад…

0
603 просмотров

Бино ба андешаи собиқадори меҳнат, устоди даҳҳо шогирдони соҳаи журналистика, доктори улуми филология, профессор Иброҳим Усмонов алҳол дар вилояти Суғд ва умуман дар Тоҷикистони соҳибистиқлол рӯзнома интишор намешавад. Зеро, нашрияе, ки дар як ҳафта на кам аз 5 шумора дарҷ мешавад, номи “рӯзнома”-ро соҳиб мегардад. Яъне, рӯзнома бояд номаи рӯз бошад. Вале…

Шояд ин суханҳо ҳамаро дар ҳайрат гузоранд.

Феълан дар кишвар, бахусус, шимоли он — вилояти Суғд, нашрияҳои зиёде чоп мешаванд, аммо онҳо чун ҳафтанома ва моҳнома шинохта шудаанд.

Газета-2

Ҳатто, нашрияҳои маъруфи давлатӣ: “Ҷумҳурият”, “Садои мардум” ва “Ҳақиқати Суғд”-ро низ аз рӯи гуфти профессор И.Усмонов ҳуқуқи “рӯзнома” номидан надорем. Зеро, онҳо ҳафтае се шумора нашр мешаванду халос.

Дар сӯҳбат бо собиқадорони соҳаи матбуот Солеҳбой Дадобоев, Карим Шариф, Файзулло Атохӯҷаев мусаллам гашт, ки дар солҳои 70-90-уми асри ХХ нашрияи вилоятии “Ҳақиқати Суғд” ҳар рӯз аз чоп мебаромад ва ба маънои томаш “рӯзнома” ҳисобида мешуд.

Газета-3

Дар шароити кунунӣ шояд аз сабаби вазъи молиявии идораи нашрия ва ё теъдоди ками хонандагон (обуначиён), “Ҳақиқати Суғд” наметавонад ҳадди ақал ҳафтае 5 шумора интишор шавад.

Аммо, бояд донист, ки матбуот аз рӯзи нахустини пайдоиш мақому манзалати хешро аз даст надода, баръакс сол аз сол нуфузи бештареро ба худ касб менамояд. Дар қисме аз кишварҳои пешрафта бо вуҷуди он ки технологияи пешқадам дар онҳо тавлид мегарданд, вале боз ҳам талабот ба рӯзнома дар ҳоли афзоиш қарор дорад. Шаҳодати гуфтаҳои боло давлати пешрафтаи Ҷопон (Япония) буда метавонад. Тибқи маълумоти ба даст расида, дар ин кишвар дар солҳои охир шумораи нашрияҳо дар ҳоли афзоиш аст.  Ба ин хотир метавон ҳадс зад, ки дар ҳеч давру замон ҷои рӯзномаро чизе иваз карда наметавонад.

Президент

Президенти Ҷумҳурии Тоҷикистон, мӯҳтарам Эмомалӣ Раҳмон борҳо гуфтаанд: “Имрӯз матбуот ҳамқадами ҳаёт ва ҷузъи хеле муҳиму ҷудонопазири ҷомеаи озоду демократии мо буда, дар таъмини фазои иттилоотӣ, ба шаҳрвандон дар интихоби дурусти мавзӯъ ва дарёфти ҳақиқат имкониятҳои васеъ фароҳам месозад”.

Дар воқеъ, матбуот чашму гӯши халқ, муҳимтарин рукни ҷомеаи демократӣ мебошад ва ҷомеаро аз бисёр нокомиҳои зараровар раҳо карда метавонад.

Ин навбат хостем бо рӯзномаи куҳантарини вилояти Суғд, ки таърихи 85-сола дорад ва дӯстдори ҳамагон гаштааст, худ шинос шавем ва шуморо низ ошно намоем. Нахуст доир ба таърихи рӯзномаи «Ҳақиқати Суғд» — нашрияи Мақомоти иҷроияи ҳокимияти давлатии вилояти Суғд чанд маълумоти муфидро пешниҳоди Шумо мегардонем.

Шумораи якуми нашрия 25-уми марти соли 1930 бо унвони «Роҳи колхозчӣ» аз чоп баромад ва муҳаррири он Муҳаммадҷон Ҳасанов буд. Баъдан ин рӯзнома бо номи «Колхозчӣ», аз соли 1931 «Пролетари Хуҷанд», «Болшевики Хуҷанд», «Бо роҳи Ленинӣ» ва аз 20-уми июни соли 1940 «Стахановчӣ» ном гирифтааст. Аз 1-уми январи соли 1948 ин нашрия номи «Ҳақиқати Ленинобод»-ро гирифт. Баъд аз соҳибистиқлол гаштани Тоҷикистон ва иваз шудани номи вилояти Ленинобод ба Суғд нашрияро «Ҳақиқати Суғд» номгузорӣ намуданд.

Газета-5

Дар тӯли 85 соли фаъолият рӯзномаи «Ҳақиқати Суғд» барои ривоҷу равнақи кишвар, тарбия намудани шаҳрвандон бомаърифату бофарҳанг, тарғибу ташвиқи ғояҳои ватандорӣ, дӯстии халқҳо хизмати шоёнеро ба сомон расонидааст.

Даҳҳо рӯзноманигорони баркамол, нависандагону шоирон дар идораи рӯзномаи мазкур тарбия ёфта, дар самти эҷодиёт қадамҳои устувор гузоштанд ва ҳоло ифтихори халқу Ватан мебошанд.

Имрӯз низ кормандони ин нашрия барои рушду нумӯи кишварамон, болоравии сатҳи иқтисодиву иҷтимоӣ, таҳкими сулҳу ваҳдат, мустаҳкам гаштани пояҳои давлатдории демократӣ, ҳуқуқбунёд ва дунявӣ, тарғиби ғояҳои олии ватандӯстӣ, хештаншиносӣ, эҳёи ҳофизаи таърихии халқ саҳми назаррас гузошта истодаанд.

Рӯзномаи «Ҳақиқати Суғд» шоҳиди зиндаи воқеаҳои таърихии асрҳои ХХ ва ХХI  буду ҳаст.

Газета-6

Рӯзномаву маҷалла, радиову телевизион, дар маҷмӯъ  ВАО пулест миёни давлат ва ҷомеа. Яъне, бидуни ВАО иртибот барқарор намудан хеле душвор аст. Ба ин хотир, мардум ба ВАО, бахусус, ба матбуот боварии зиёд доранд. Дар ҳолати зарурӣ ба рӯзнома муроҷиат менамоянд, мушкилоти хешро баён месозанд. Ҳинни омӯзиш огоҳ шудан мумкин аст, ки то чи андоза матбуот ба мардум хизмат менамояд, то чи андоза манфиати хонандаро ҳимоя месозад. Чӣ рӯзномаи давлатӣ ва чӣ ғайриҳукумативу ҳизбӣ метавонанд барои ҷомеа манфиатбахш бошанд. Имрӯз дар тамоми кишварҳои ҷаҳон матбуот ҳамчун силоҳи пурқувват ва пуриқтидор истифода бурда мешавад. Яъне, кишваре нест, ки бидуни матбуот вуҷуд дошта бошад. Аммо озодии матбуот дар тамоми мамолики ҷаҳон якранг набуда, балки вобаста ба шакли давлатдорӣ ва қонунҳои амалкунанда мебошад. Ба андешаи олим ва муҳаққиқи маъруф Мурод Муродӣ дар Тоҷикистони кунунӣ озодии матбуот ва ақида мавҷуд аст. Ба қавли ӯ амал кардани нашрияҳои гуногун аз қабили ҳукумативу ғайриҳукуматӣ, ҳизбиву ҷамъиятӣ ва ғайраҳо худ гувоҳи он аст, ки дар Тоҷикистон озодии матбуот ва озодии баён ҳаст. Аз тарафи дигар мавҷудияти рӯзномаҳои гуногун боиси рақобати эҷодӣ мегардад. Вақте, ки рақобат ба миён омад, хоҳ нохоҳ сифату мазмун низ тағйир меёбад. Ҳарчанд муҳаққиқони соҳаи рӯзноманигорӣ бар он назаранд, ки миёни нашрияҳои мо ҳеҷ рақобате дида намешавад. Агар рақобат танҳо барои пешравии кор бошад, ин бад нест, вале агар рақобати сӯзанда бошад, пас беҳтар он аст, ки набошад.

Газета-7

Рӯзномаи “Ҳақиқати Суғд” дар вилоят яке аз нашрияҳое мебошад, ки ду давраро паси сар намудааст, яъне, замони шӯравӣ ва давраи соҳибихтиёрии Тоҷикистонро.

Рӯзнома сол аз сол аз ҷиҳати пешниҳоди мавзӯъ ва баланд бардоштани маърифати хонанда талошҳои зиёд намуда истодааст. Ҳамчунин, дар тайёр намудани рӯзноманигор “Ҳақиқати Суғд” мактаби бузургест.

Мактаби журналистии «Ҳақиқати Суғд» дарозои 85 сол дар ҳақиқат дабистонеро мемонад, ки шогирдони арзандаю шоиста тарбия кардаасту саҳифаҳои китоби журналистикаи тоҷикро рангинтар ва пурҷило гардондааст.

Сармуҳаррирони рӯзнома Муҳаммадҷон Ҳасанов, Абдумаҷид Паҳлавонзода, Тоҷӣ Усмон, Саид Носиров, Юлчӣ Бобоев, Ҳоҷӣ Содиқ, Раҳмат Саидов, Набиҷон Абдуллоев, Ғаффорхоҷа Яҳёхоҷаев, Усмонҷон Тоҷибоев, Ғуфронҷон Рустамов, Файзуллохоҷа Атохоҷаев, Мазбут Вoҳидов, Дадоҷон Раҷабӣ,  Маҳмудҷон Иброҳимов, Саодатхон Каримова, Карим Шариф ва сармуҳаррири имрӯза Мухтор Абдуллоев баҳри ташаккули кори идораи нашрия саҳми назаррас гузоштаанд.

Ҳамчунин, собиқадорони матбуот Аюбҷон Умаров, Эргаш Мӯҳсинзода, Ҳафиза Наимова, Комилҷон Пӯлодов, Карим Солеҳзода, Исмоил Бобоҷонов, Усмон Олим, Муҳаммадҷон Юсуфов, Исроилҷон Исмоилов, Болтухон Хӯҷаев, Ҳомидҷон Олимӣ, Хайринисо Муҳиддинова, Мулло Боқӣ, Неъмат Шариф, Акобир Нарзиев, Абдураззоқ Умаров, Ӯрунбой Орифов, Саидхон Мамадов ва дигарон, ки аксарияташон алҳол дар қайди ҳаёт нестанд, дар поягузорию мустаҳкам намудани мавқеи матбуоти чопӣ, минҷумла, рушду нумӯи рӯзномаи «Ҳақиқати Суғд» ҷидду ҷаҳди зиёд ба харҷ додаанд.

Фото-9

Феълан дар идораи нашрияи “Ҳақиқати Суғд” таҳти роҳбарии сармуҳаррир Мухтор Абдуллоев кормандони эҷодиву техникӣ Тавҳида Ҷӯраева, Абдуғафур Аминзода, Сурайё Ҳакимова, Рафоат Мӯъминова, Файзулло Атохӯҷаев,  Сайидамин Умаров, Гулҷаҳон Маҳкамова, Шоира Салимова, Маъмурахон Самадова, Шаҳноза Ҳомидова, Алиҷон Олимов, Нодирҷон Турсунов, Улуғбек Худойбердиев, Роҳатхон Эшонова, Мунира Олимова, Раъно Юсуфова, Маъруфҷон Ҳомидов, Шаҳноза Азимова, Барно Абдуғаффорова, аксбардор Инъомҷон Рабиев ва дигарон софдилонаву сарбаландона рисолати хешро иҷро менамоянд.

Аз саҳифаҳои нашрия эҳсос карда мешавад, ки фикрронии мутахассисон, таҷрибаи кори онҳо ва дархосту пешниҳодоти эшон баҳри беҳтарсозии некӯаҳволии мардум бештар гардидаанд. Яъне, нашрияи вилоятии «Ҳақиқати Суғд» рисолати аслии худро иҷро карда истодааст. Зеро, аз ҷиҳати чоп чун рӯзномаи рақами «якум» дар қаламрави вилояти Суғд эътироф гардидааст, аз ин боис бо дастгирии муассис ҳафтае се шумора бо теъдоди 6 ҳазору 250 нусха интишор меёбад. Бояд гуфт, ки аз рӯзи чопи шумораи якумин то ба имрӯз (дар муддати 85 сол) беш аз 17 ҳазору 500 шумора нашр шудааст.

Зикр кардан ба маврид аст, ки кормандони нашрия кӯшиш карда истодаанд, то ба талаботи имрӯзаи роҳбарони Ҳукумати Ҷумҳурии Тоҷикистон, МИҲД-и вилояти Суғд ва шаҳрвандони вилоят ба пуррагӣ ҷавобгӯ бошанд ва бештар маводи дархури ҷомеаро омода ва дарҷ намоянд.

Кохи матбуот

Чун дар рӯзҳои таҷлили 85-солагии чопи нахустин шумораи ҷаридаи “Ҳақиқати Суғд” — нашрияи Мақомоти иҷроияи ҳокимияти давлатии вилояти Суғд қарор дорем, дар ҷодаи вазнини қаламфарсоӣ, суханвариву сухангустарӣ барои эшон тавфиқу таҳаммулпазирӣ ва барору музаффариятҳо хоҳонем.

Нет комментариев

Также рекомендуем