Ҷонибек Муродов, яке аз сарояндаҳои маъруфи попи тоҷик бо забони украинӣ суруд иҷро кардааст.
Бино ба иттилои расонаҳои украинӣ, ин тарона “Прощай” ном дошта, матни он ба шоир Иван Франко тааллуқ дорад. Клипи ин тарона дар Киев сабт хоҳад шуд.
Торнамои “liza.ua” менависад, Украина барои Ҷонибек бегона нест: “Ҳанӯз дар кӯдакӣ сароянда бо духтараки украинӣ – Олесия, ки тобистон ба назди хешовандонаш ба Осиёи Марказӣ омада буд, дӯстӣ дошт. Ҳамон вақт Ҷонибек ваъда дод, ки хонандаи маъруф мешавад. Бо гузашти чанд вақт иртибот бо духтар қатъ шуд, аммо ҳамеша мехост, ки дар бораи Ватани ишқи аввали худ маълумот дошта бошад. Ҷонибек хонандаи ҳирфаӣ шуд ва барои дидани дӯсти кӯдакиаш ба Киев омад, аммо вай аллакай шавҳар карда буд. Олесия барои хотира ба Ҷонибек китоби гулчини ашъори шоирони Украинаро тақдим намуд. Ҳамин китоб ӯро барои суруди нав таҳрик дод”.
Мусиқии таронаи нави Ҷонибекро Александр Яшин навиштааст ва клипи онро коргардони шинохтаи украинӣ Владимир Якименко таҳия хоҳад кард.
Ҷонибек Муродов фарзанди сарояндаи маъруф устод Ҷӯрабек Муродов буда, 29 майи соли 1988 таваллуд шудааст. Аз соли 1998 то 2005 дар гурӯҳи “Боло” ва аз соли 2006 то 2007 дар гурӯҳи “Вазир” ҳунарнамоӣ кардааст. Шурӯъ аз соли 2007 ба танҳоӣ сарояндагӣ мекунад.
Вай чанд бор ҷоизаи Big Apple Music Awards, яке аз ҷоизаҳои маъруфи мусиқӣ дар Амрикоро соҳиб шудааст. Ҳамчунин солҳои 2005, 2006 ва 2007 ҷоизадори озмуни ҷумҳуриявии “Суруди сол”, соли 2008 ғолиби озмуни “Ситораи сол” шуд. Вазорати фарҳанг ҷоизаи “Беҳтарин сарояндаи соли 2011”-ро ҳам ба Ҷонибек муносиб донист. Ҳамчунин дар ин сол вай ҷоизаи “Беҳтарин клип”-ро соҳиб гардид.
Манбаъ: http://www.ozodagon.com/
Нет комментариев