Дар толори Осоишгоҳи “Баҳористон” маросими ҷамъбасти озмуни вилоятӣ барои беҳтарин маводи журналистӣ таҳти унвони «Хомаи созанда-2018» доир гардид ва ба ғолибон ҷоизаҳо супорида шуд.
Дар маросими ҷоизасупорӣ котиби матбуотии Раиси вилоят Музаффар Юнусов иброз дошт, ки дар оғози соли 2018 Мақомоти иҷроияи ҳокимияти давлатии вилояти Суғд бо мақсади дастгирии журналистон ва сари вақт хабардор кардани ҷомеа аз раванди рушду такомули соҳаҳои мухталифи хоҷагии халқ, шарҳу тавзеҳи воқеъбинона, асосноки дигаргунсозӣ ва проблемаҳои дорои аҳамияти махсуси иҷтимоидошта, ҳамзамон ҷалби таваҷҷӯҳи аҳли ҷомеа ба масъалаҳои ҳалталаб миёни журналистон барои беҳтарин маводи журналистӣ озмун эълон намуда буд.
Озмуни мазкур тибқи қарори Раиси вилояти Суғд аз 3 апрели соли 2018, №98 “Дар бораи гузаронидани озмуни вилоятӣ барои беҳтарин маводи журналистӣ таҳти унвони «Хомаи созанда-2018» гузаронида шуда, тибқи муқаррарот аз 1 то 20-уми октябри соли 2018 қабули маводҳо ба роҳ монда шуд. Дар натиҷа, беш аз 60 нафар журналистон дар номинатсияҳои “Масъалаҳои марбут ба рушди сайёҳӣ”, “Масъалаҳои марбут ба рушди ҳунарҳои мардумӣ”, “Масъалаҳои марбут ба соҳаи саноат”, “Масъалаҳои марбут ба соҳаи кишоварзӣ” ва “Муаррифии минтақаҳои сайёҳӣ ва анъанаву ҳунарҳои мардумӣ дар сатҳи байналмилалӣ” маводҳои худро барои баррасӣ пешниҳод намуданд.
Ҳайати ҳакамон ғолибони озмунро муайян намуд ва ҳамин тариқ дар бахшҳои гуногун Равзалӣ Амонов, Неъматулло Мирсаидов, Лола Раҷабова, Қамари Аҳрор, Субҳиддин Қодиров, Тилав Расулзода, Илҳом Ҳошимов, Обидҷон Каримов, Эҳсон Муҳаммадиев, Ислом Бобоев, Мадина Узоқова, Мастона Муҳиддилозода, Ӯрунбой Усмонов, Ҷамшеди Маъруф, Афзал Босолиев, Маҳмуд Аҳмадов, Дилрабо Анорқулова, Муҳаббат Муродова, Маъмура Самадова ва дигарон ғолиб дониста шуданд.
Раиси вилоят Раҷаббой Аҳмадзода кулли ғолибони озмунро табрик намуда, ба онҳо Диплом ва мукофотҳои пулӣ тақдим намуд.
Манбаъ: Хадамоти матбуоти Раиси вилояти Суғд
Нет комментариев