Таҷлили бошукӯҳу хотирмони 15-солагии Радиои “ТИРОЗ”

1306

Имрӯз сешанбе, 1-уми марти соли 2016-уми мелодист. Имрӯз ба таъсисёбиву пахши нахустин барномаи Радиои “Тироз” 15 сол пур шуд. Аз ин лиҳоз, роҳбарият, кулли кормандон ва қабл аз ҳама шунавандагони азизу сершумори радиоро бо ҷашни саиду таърихӣ таҳният менамоем.

Ба муносибати 15-солагии Радиои “Тироз” тибқи нақша-чорабиниҳо ва ҷадвали махсуси қаблан аз ҷониби Сарвари кулли Ширкати телевизион, радио ва рекламавии “Тироз” Хуршед Азимҷонович Ӯлмасов тасдиқшуда, аз субҳи барвақт тамоми кормандони эҷодӣ ва техникии радио ба ҷойи кор ҳозир шуданд. Барои ин аз ҷониби роҳбарияти ширкат дар масъалаи таъминоти коркунон бо нақлиёт тамоми чораҳои зарурӣ андешида шуданд.

Ҳамин тавр, бо баробари ҳозир шудан ба хонаи дуюми хеш, Радиои азизу даргоҳи муқаддас, ки ном “ТИРОЗ” аст, онро ба шаклу намуди зеботар аз рӯзҳои дигар, бинои бисёр орододашуда ва музайяну назаррабо дидем.

Ҳамкорон аз субҳ ва аз даромадгоҳ оғоз намуда, ҳамдигарро хуб ба оғӯши гарм гирифта, сидқан табрик менамуданд.

Тибқи нақша-чорабиниҳо ҳамаи барномаҳо барои санаи 1-уми март рӯи мавҷҳои 103,7FM – Радиои “Тироз” ва 106,7 FM – Радиои “Тирози Ҷавонӣ” пурра ба таври мустақим пахш гардиданд. Тӯҳфаи радио барои шунавандагони сершумораш ин буд, ки маҳз дар ин рӯз пахши барномаҳо бе ягон эълону реклама сурат гирифт.

Ҳамин тавр, расо соати 7:00-и субҳ барномаи идонаи дусоатаи “Паёми субҳ” ба таври мустақим рӯи мавҷи ҳар ду шабакаи радио “Тироз” ва “Тирози Ҷавонӣ” баромад. Дар қисми аввали барнома, ки бо забони тоҷикӣ бо ровиёни хушкалому ширинсухан Зарнигори Рустам ва Фаррух Файзуллоев пешкаши шунавандагон гардид, бо шахсони барӯманди вилоят ва ҷумҳурӣ устоди устодони санъати эстрадии тоҷик Анвар Қосимов ва муовини Раиси Ҳизби Халқии Демократии Тоҷикистон Бобоҷониён Раънохон Маҳмудзода мустақиман дар тамос шуда, тарикоти онҳоро барои роҳбарият ва кормандони Радиои “Тироз” ва қабл аз ҳама ба шунавандагони азиз расониданд. Дар қисми дуюми барнома, ки бо забони русӣ бо ровиёни соҳибистеъдод Екатерина Ким (аввалин наттоқи Радиои “Тироз”) ва Дима Беликов боз ҳам мустақиман пешниҳод гардид, устоди сиёсатшиносон ва ҳидоятгари ҷавонон Нарзулло Дадобоев ва варзишгари маъруфи тоҷик Зебунисо Рустамова дар тамос шуда, ҳамагонро бо 15-солагии Радиои “Тироз” муборакбод намуданд.

Дар асоси ҷадвал пас аз хатми он, барномаи идонаи “Ҳозирҷавоб”, композитсияи идонаи “Ҷашни Радиои “Тироз”, барномаи “Радио микс” (бо забони русӣ), барномаи идонаи дусоатаи “Ҳамроз” ва дар байни онҳо барномаи махсуси идонаи “15 сол дар фазои кишвар” рӯи мавҷ бароварда шуданд. Дар рафти ҳамаи барномаҳо шаҳрвандони синну сол ва касбу кори гуногун бо студия ба таври мустақим дар тамос шуда, салому паём ва табрикоти хешро расониданд. Аз ҷумла, раиси кумиҷроияи вилоятии Ҳизби Халқии Демократии Тоҷикистон Сарфароз Юнусов (собиқ корманди Радиои “Тироз”), мудири шӯъбаи фарҳанги Мақомоти иҷроияи ҳокимияти давлатии шаҳри Хуҷанд Бахтиёр Қосимов ва ситораи дурахшони тоҷик Ҳасани Камол муборакбодии хешро тавассути барномаҳо ба шунавандагону кормандони радио расониданд.

Ҳамзамон, дар ин рӯз кормандони радио Илҳомҷон Бобоев ва Шодмон Ашӯров дар мавзеҳои гуногуни шаҳри Хуҷанд шуда, суханони табрикии шаҳрвандонро бо студияи радио ва шунавандагони он пайваст намуданд. Ҳамчунин, беҳтарин табриккунандагонро бо «Купони Тироз», ки ҳуқуқи дар давоми як ҳафта (аз 1-ум то 31-уми марти соли равон) ба таври ройгон имкони пешниҳоди эълонҳои хешро тавассути радио доранд, сарфароз гардониданд.

Аз ҳама муҳим ва хотирмон он буд, ки дар давоми рӯз дӯстони ба маънои томаш азизу арҷманди Радиои “Тироз” ва роҳбарияту кормандони он, устодону шахсони маъруф Нарзулло Дадобоев, Анвар Қосимов, Аъзамхон Акбаров, сарояндагони соҳибистеъдод Дилноза Каримова, Абураҳмон Нурматов, собиқ кормандони радио Қаҳрамон Ахмедов, Нилуфар Умарова, Аслиддин Очилов, Шӯҳрат Раҳимов ва дигарон ба даргоҳи муқаддаси “ТИРОЗ” омада, бевосита дар рӯбарӯи кормандони эҷодӣ ва техникии Радиои “Тироз” таҳти роҳбарии Сарвари кулли ШТРР “Тироз” Хуршед Азимҷонович Ӯлмасов табрики сидқидилона ва самимонаи хешро расониданд.

Аз субҳ кормандони Телевизиони “АЗИЯ” барои наворгирӣ ва омода намудану ба мавҷ баровардани барномаи махсуси идона ба ШТРР “Тироз” омада, аз ҷараёни фаъолияти кормандони эҷодӣ ва техникӣ сабти барнома намуданд.

Tiroz-15-sol (178)

Тӯҳфаи хеле зебо ва беназир дар ин рӯз барои роҳбарият ва кулли кормандони “Тироз” — ин ҳадяи шогирд ва танзимгари радио — Хусравҷон буд, ки ба шакли дарахти мевадиҳанда бо меваҳои шаҳду шакаринаш, яъне бо акси Сарвари кулли ШТРР “Тироз” Хуршед Азимҷонович Ӯлмасов ва фаъолону пешсафони ин даргоҳ омода шудааст.

Бояд гуфт, ки ҷашни 15-солагии Радиои “Тироз” тамоми сол идома меёбад. Зеро, “Соли 2016-ум – Соли 15-солагии Радиои “Тироз” аст.

Дар охир, аз номи кормандони Медиапортали “Тироз” роҳбарият ва ҳамаи кормандони эҷодӣ ва техникии радиои маҳбубу сершунавандатарин дар вилояти Суғд – Радиои “ТИРОЗ”-ро бо 15-умин солгарди пахши нахустин барномаи радио самимона табрик менамоем!

Ҷашни саиду фархундаи “Тироз” хуҷаста бод!      

4 КОММЕНТАРИИ

  1. Что пожелать в 15 лет? Расти,
    веселиться, достигать высот, добиваться
    поставленных целей, побеждать. А еще
    желаю крепкого здоровья, огромного
    счастья, умопомрачительной любви.
    Пусть фортуна всегда улыбается тебе.
    С днем рождения!

ОСТАВЬТЕ ОТВЕТ

Лимит времени истёк. Пожалуйста, перезагрузите CAPTCHA.