Таҷлили Иди Наврӯз дар “Қасри маданияти Арбоб”

0
786 просмотров

21 марти соли 2019 дар Муассисаи давлатии “Қасри маданияти Арбоб” бо иштироки беш аз 11 000 нафар собиқадорони меҳнат, кормандони мақомоти давлатӣ, намояндагони шаҳру ноҳияҳои вилоят, ташкилотҳои ҷамъиятӣ ва байналмилалӣ, ҳизбҳои сиёсӣ, аҳли зиё, воситаҳои ахбори омма, кормандони соҳаҳои маорифу тандурустӣ, фарҳангу кишоварзӣ, устодону донишҷӯёни донишгоҳу донишкадаҳои олӣ Иди байналмилалии Наврӯз ҷашн гирифта шуд.

Ин бор саҳн ва даромадгоҳи Муассисаи давлатии “Қасри маданияти Арбоб” ба базмгоҳи наврӯзӣ табдил ёфта, дар растаю хаймаҳои идона бо риояи анъанаҳои миллӣ суфраҳои наврӯзии ҳафт сину ҳафт шин ва таомҳои миллии хоси Наврӯз, шириниҳои миллӣ, суманак, маҳсулоти соҳаи саноат, ҳунарҳои мардумӣ, аз қабили қолинбофӣ, бофандагӣ, сӯзанидӯзӣ, кулолгарӣ, зардӯзӣ, қуроқдӯзӣ, гаҳворасозӣ ба намоиш гузошта шуд.

Барномаҳои бадеии театрикунонидашуда ва фарҳангӣ, ҳунарнамоии карнайнавозону дойрадастон, қироати суруди “Бойчечак” аз ҷониби хонандагони муассисаҳои таҳсилоти миёнаи умумӣ ба сокинону иштирокчиёни чорабинии Наврӯзи хуҷастапай руҳияи идона бахшид.

Муовини якуми Сарвазири Ҷумҳурии Тоҷикистон Давлаталӣ Саид ва Раиси вилояти Суғд Раҷаббой Аҳмадзода, ки бо мақсади иштирок дар тантанаҳои наврӯзӣ ба идгоҳ ташриф оварда буданд, аз растаю хаймаҳои наврӯзӣ боздид намуда, ба ҳунару истеъдоди ҳунармандону пазандагон ва таҳиякунандагони суфраҳои наврӯзӣ баҳои баланд доданд.

Муовини якуми Сарвазири мамлакат Давлаталӣ Саид зимни суханронии худ сокинони вилояти Суғдро аз номи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон табрик гуфта, иброз дошт, ки Наврӯзи хуҷастапай аз ҷашнҳои куҳани тоҷикон маҳсуб ёфта, дар солҳои соҳибистиқлолӣ суннатҳои хосаи наврӯзӣ эҳё гардиданд. Бо талошҳои Пешвои миллат муҳтарам Эмомалӣ Раҳмон Наврӯз дубора дар сархати ҷашнҳои миллии тоҷикон қарор гирифта, шукӯҳи он ҳамасола боло меравад.

Раиси вилоят Раҷаббой Аҳмадзода низ иштирокдорони чорабинӣ ва кулли сокинони вилоятро ба муносибати фарорасии Наврӯзи байналмилалӣ табрик намуда, таъкид кард, ки бо ташаббусҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ойину ҷашнҳои миллӣ ва арзишҳои фарҳангие, ки ваҳдату ягонагии маънавии мардумро таҳким мебахшанд, ба Феҳристи мероси Созмони Милали Муттаҳид ворид гардида, бо шукуҳу шаҳомати хоса таҷлил мегарданд. Яке аз чунин ҷашнҳои фархунда Наврӯзи хуҷастапай аст, ки моро ба истиқрори сулҳу ваҳдат, якдигарфаҳмӣ, барафрохтани чароғи дӯстиву рафоқат, ба ҷо овардани амалҳои хайру савоб, худшиносиву худогоҳӣ ҳидоят менамояд. Таҷлили бошукуҳи Наврӯзи фархундапай дар марҳилаи сифатан нави ҳаёти сиёсӣ, иҷтимоӣ ва фарҳангӣ, ҷиҳати омодагиҳо ба ҷашни мубораку муқаддаси 30-солагии Истиқлолияти давлатии Ҷумҳурии Тоҷикистон ва баланд бардоштани нуфузу эътибори кишвари азизамон мусоидат хоҳад намуд.

Барномаи рангину пурмуҳтавои фарҳангӣ ва таронаву сурудҳои санъаткорони номии вилоят ба чорабинии наврӯзӣ хотима бахшид.

Манбаъ: Хадамоти матбуоти Раиси вилояти Суғд

Нет комментариев

Также рекомендуем

%d такие блоггеры, как:

Сообщить об опечатке

Текст, который будет отправлен нашим редакторам: