Ба ифтихори Рўзи байналмилалии муҳити зист дар саҳни Театри мазҳакавӣ-мусиқии ба номи Камоли Хуҷандии маркази вилоят бо иштироки садҳо нафар дӯстдорони табиати зебову нотакрори Тоҷикистон чорабинии идона доир шуд.
Раиси вилояти Суғд Раҷаббой Аҳмадзода зимни суханронии худ иброз дошт, ки дар кишварҳои мухталифи олам Рўзи байналмилалии муҳити зист ҳамчун яке аз санаҳои басо муҳим таҷлил карда мешавад, зеро дар замони муосир таъмини амнияти экологии ҷомеа аз муҳимтарин масъалаҳои умумибашарӣ ба ҳисоб меравад. Таҷлили санаи мазкур инсониятро бори дигар аз мавҷудияти муаммоҳои экологӣ ҳушдор медиҳад, зеро сол аз сол таназзулёбии табиат, хароб шудани вазъи муҳити зист дар сайёра ҳамагонро ба ташвиш овардааст. Зикр гардид, ки ҳар як сокини кишвар бояд перомуни масъалаҳои муҳими марбут ба ҳамзистии инсон бо табиат андеша намуда, барои покиза нигоҳ доштани муҳити зист ва сарсабзу хуррам гардонидани муҳити атроф саҳмгузор бошад.
-Боиси ифтихор аст, ки аз ҷониби Ассамблеяи Генералии Созмони Милали Муттаҳид иқдоми навбатии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба эълон намудани Даҳсолаи байналмилалии амал «Об барои рушди устувор, солҳои 2018-2028» қабул гардид. Аз ин лиҳоз, дар Тоҷикистони азизи мо чорабиниҳои сатҳи баланди байналмилалӣ, конфронсу симпозиумҳо, ки ба тарғибу ташвиқи донишҳои экологӣ, баланд бардоштани маърифати экологии шаҳрвандон, ҳифзу тоза нигоҳ доштани манбаи захираҳои обу хок, олами набототу ҳайвонот равона карда шудаанд, мунтазам баргузор гардида истодаанд, — таъкид дошт Раиси вилоят.
Раҷаббой Аҳмадзода инчунин афзуд, ки масъулини ҳифзи муҳити зист бояд барои пешрафти соҳа, ҳалли муаммоҳои мубрами экологӣ, махсусан ба самаранок ва сарфакорона истифода бурдани захираҳои обу замин, тозаву обод нигоҳ доштани маҳалҳои аҳолинишин ва кабудизоркунӣ, муҳофизати олами набототу ҳайвонот, беҳтар намудани ҳолати экологии минтақаҳо таваҷҷўҳ намуда, дар доираи чорабиниҳои мухталиф мунтазам барои баланд бардоштани маърифати экологӣ миёни омма корбарӣ намоянд.
Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Хайрулло Ибодзода низ дар аснои суханронии худ аз тадбирҳои андешидаи Ҳукумати мамлакат дар самти ҳифзи муҳити зист ёдовар шуда, дӯстдорони табиатро ба муносибати Рўзи байналмилалии муҳити зист табрик намуд.
Сипас, аз ҷониби Раҷаббой Аҳмадзода ва Хайрулло Ибодзода ба фаъолони соҳа сипосномаву туҳфаҳои хотиравӣ ва нишонҳои сарисинагии Кумитаи ҳифзи муҳити зисти назди Ҳукумати Ҷумҳурии Тоҷикистон супорида шуд.
Манбаъ: Хадамоти матбуоти Раиси вилояти Суғд
Нет комментариев