Имрӯз Рӯзи Артиши Миллӣ на танҳо дар Тоҷикистон, балки дар чанд кишвари дигари пасошӯравӣ ҳам ҳаст. Тавре маълум, 23 февралро дар замони СССР ҳамчун рӯзи ташкилёбии Армияи Советӣ ё Армияи Сурх ҷашн мегирифтанд. Дар ин рӯз бори аввал баъд аз Инқилоби Октябр дар наздикии Саритсинои Русия қувваҳои навташкили Артиши Сурх ба қисмҳои артиши сафед ё артиши ҷонибдори низоми шоҳии Русия ғолиб омада буданд. Минбаъд Армияи Советӣ дар бисёр ҷангҳои қарни 20 ширкат намуда, ғолиб омадааст. Муҳимтарини онҳо ғалаба дар Ҷанги Ватанӣ буд, ки он чор сол идома ёфт ва бо мағлубияти Олмони фашистӣ (1945) хотима ёфт. Артиши СССР дар ҷанг ба муқобили финҳо (1939),Ҷопон (1945) ва афсарони мушовири он дар ҷангҳои берун аз ҳудуди СССР (Ангола,Ветнам, Куба,Никарагуа) ширкат намудаанд. Охирин ҷанге, ки Артиши Шӯравӣ иштирок намуд, ин ҷанг дар Афғонистон ба муқобили қувваҳои зиддиҳукуматии ин кишвар буд. Дар ин ҷанг зиёда аз 15 000 ҷанговарон аз ҷумҳуриҳои собиқи Шӯравӣ талаф ёфтанд. Аз Тоҷикистон низ сарбозону афсарон иштирокчии ин ҷанг буданд, ки ҳоло каме бештар аз 9 000 нафари онҳо дар кишвар кору зиндагӣ мекунанд. Артиши Миллии Тоҷикистон, ки дар ҷангҳои дохилӣ ширкат намудааст, худро меросбари артиши Шӯравӣ медонад ва чун анъана 23 февралро дар кишвар ҳамасола бо тантана қайд карда мешавад.
Манбаъ: www.pressa.tj
Нет комментариев