Ташриф ба масҷиди марказии ба номи Шайх Муслиҳиддин

0
212 просмотров

Субҳи рӯзи ҷумъаи 15 июн сокинони вилояти Суғд бо шукргузорӣ аз сулҳу субот ва тинҷиву осоиштагӣ намози Иди Фитрро барпо дошта, барои рушду нумӯи Тоҷикистони соҳибистиқлол дасти дуо бардоштанд.

Дар ин рӯз Раиси вилояти Суғд Раҷаббой Аҳмадзода ба масҷиди марказии ба номи Шайх Муслиҳиддини шаҳри Хуҷанд ташриф оварда, кулли сокинони вилояти Суғдро ба муносибати Иди Рамазон табрик гуфт.

Зимни ироаи паёми табрикии худ Раиси вилоят Раҷаббой Аҳмадзода қайд кард, ки дар моҳи мубораки Рамазон бо нияти хайр анҷом додани амалҳои нек, дастгирии якдигар, ҳамдигарфаҳмӣ, авфи гуноҳҳо, аз дилҳо рондани кинаю адоват, аёдати беморон, эҳтироми падару модар ва хешу таборон, аз Офаридгор талаби оромиву осоиши сарзамин ва рушду шукуфоии онро кардан аз одат ва фазилатҳои аслии милливу динии мардуми бунёдкор ва созандаи мо ба ҳисоб рафта, бешубҳа дар таҳкими сулҳу ризоият ва ваҳдату якпорчагии ҷомеа мусоидат менамояд.

-Имрӯз ҳуқуқ ва арзишҳои олии эътиқодии шаҳрвандони мусулмони кишвар таҳти ҳимояи ҳамешагии давлат ва Ҳукумати Тоҷикистон қарор дошта, баланд бардоштани сатҳу сифати зиндагии мардум, рушди устувори давлатдории миллӣ ва фароҳам овардани зиндагии босаодати ҳар хонадони Тоҷикистон аз муҳимтарин ҳадафҳои давлатдории Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ба ҳисоб меравад, — таъкид намуд Раиси вилоят.

Раҷаббой Аҳмадзода ҳамзамон афзуд, ки “ҳар як фарди огоҳу бедордил ва бонангу номус аз суханронии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мулоқот бо намояндагони ҷомеаи кишвар рӯҳу илҳоми тоза гирифта, сабақҳои мактаби одамияти гузаштагони бузург, бахусус таълимоти пири мазҳаби мо Имоми Аъзамро, ки барои рушди маънавии мардум саҳми беназир гузоштааст, ҳамеша дар ёд нигоҳ медорад. Барои сулҳу суботи ҷовидонаи сарзамини аҷдодӣ, таҳкими ваҳдати миллӣ, ободӣ, оромиву осудагии Ватани азизамон, дастгирии шахсони ниёзманд, ятимону бепарасторон ва барҷомондагон хайру эҳсонро дареғ надошта, барои осудагии ҳар хонаводаи халқи Тоҷикистон кӯшиш менамояд. Зеро, Ислом дини инсофу адолат, сулҳу амният, талқингари ахлоқи ҳамида ва маънавияти созанда буда, ҳама гуна аъмоли зишту харобиовар, озору шиканҷа, хушунату зӯроварӣ ва қатлу ғоратро маҳкум менамояд ва хилофи зуҳуроти манфии таҳдиду хатарҳои муосир, аз ҷумла терроризм ва экстремизм мебошад”.

Бояд гуфт, ки дар ин рӯз мусалмонони вилоят дар 104 масҷиди ҷомеи шаҳру ноҳияҳои вилоят намози идро адо намуданд ва намояндагони Мақомоти иҷроияи ҳокимияти давлатии вилояти Суғд паёми табрикии Раиси вилоят ба муносибати Иди Фитрро ба самъи сокинони шаҳру ноҳияҳо расониданд.

Манбаъ: Хадамоти матбуоти Раиси вилояти Суғд

Нет комментариев

Также рекомендуем