Тавсияҳои Абӯалӣ ибни Сино барои муолиҷаи даҳҳо намуди беморӣ

473

Ҳар сол санаи 18-уми август дар Тоҷикистони соҳибистиқлол кормандони соҳаи тиб иди касбии худро таҷлил мекунанд. Ҷашнгирии Иди кормандони соҳаи тиб аз рӯзи таваллуди бузургтарин донишманд ва табиби ҷаҳонӣ Авитсенна — Абӯалӣ ибни Сино сарчашма мегирад.

Абӯалӣ ибни Сино

Ба ин муносибат субҳи имрӯз дар пойтахти кишвар-шаҳри Душанбе дар пояи пайкараи аллома, ҳакими Машриқзамин Абӯалӣ ибни Сино маросими гулгузорӣ доир гардид. Табибон дар ин рӯз хотири ин аллома ва табиби бузургро пос дошта, бори дигар хизматҳои Синоро дар тибби ҷаҳонӣ зикр намуданд.

Имрӯз дар тамоми шаҳру навоҳии вилоят чорабиниҳои тантанавӣ баргузор мегарданд. Дар он табибони хидматнишондодаи соҳа бо унвони «Аълочии тандурустии Ҷумҳурии Тоҷикистон» ва ифтихорномаву тӯҳфаҳо қадрдонӣ карда мешаванд.

Табибони тоҷик

Бояд гуфт, ки дар чорабинӣ инчунин ғолибони озмунҳои «Духтури беҳтарин», «Ҳамшираи беҳтарин» ва ғайра муайян мегарданд.  Ҳамчунин дар назар аст, ки аз ҷониби иттифоқҳои касаба низ духтурон бо тӯҳфаҳо сарфароз гарданд.

Хотиррасон мекунем, ки Парлумони ҷумҳурӣ соли 1995 Иди касбии табибонро ба номгӯи идҳои давлатӣ ворид намуд ва он акнун  ҳамасола дар зодрӯзи Ҳаким Абӯалӣ ибни Сино ҷашн гирифта мешавад.

Абӯалӣ ибни Сино бузургтарин симои олами тибби ҷаҳонӣ мебошад. Вай беш аз 450 рисолаи илмӣ навиштааст, ки то замони мо танҳо 240-тояшон расидаанд. Ин рисолаҳо тамоми соҳаҳои илмро фаро гирифта, 150 адад ба илми фалсафа ва беш аз 40-тои дигар ба илми пизишкӣ тааллуқ доранд.  Маъруфтарин асарҳои ӯ китобҳои «Аш-Шифо» ва «Ал-Қонун» мебошанд, ки бузургтарин донишномаҳои илмӣ ва фалсафии ҷаҳон ба шумор мераванд.

Авитсенна

Абуалӣ ибни Сино дар ҷаҳон пурмаҳсултарин олим ва адиб эътироф гаштааст. Фаъолияти эҷодии вай аз 17-18-солагиаш дар солҳои 996-997 шурӯъ шуда, расо 40 сол давом кардааст.

Абӯалӣ ибни Сино дар рушди илми тиб саҳми бениҳоят арзанда гузоштааст. Вай дар пешрафт ва тараққиёти дигар соҳаҳои илми тиб низ хизмати босазо кардааст. Ӯ усулҳои набзшиносӣ, табшиносӣ, бавлшиносӣ ва вабошиносиро нишон дода, роҳҳои муолиҷаи чунин бемориҳоро тавсия додааст. Хизматҳои Ҳаким Сино дар соҳаи дорушиносӣ ва дорусозӣ низ беҳамто мебошанд.

Имрӯз дар Тоҷикистон ба эҳтироми ин ҳакими бузург хиёбоне дар пойтахт номгузорӣ шуда, ба муносибати 1000-солагии мавлудаш дар маркази шаҳри Душанбе муҷассамааш гузошта шуд.

Донишгоҳи давлатии тиббии Тоҷикистон низ имрӯз номи ӯро дошта, бо номи ин олим Мукофоти давлатӣ таъсис дода шудааст.

Табибони тоҷик-2

Дар вилояти Суғд қабул гардидани Барномаи вилоятии «Соли 2016-соли фарди солим» басо рамзист.

Алҳол дар муассисаҳои тиббии вилоят 4800 нафар духтурон, 15 ҳазору 100 нафар кормандони миёнаи тиб содиқонаву сарбаландона ба аҳолӣ хизмат мерасонанд.

 

Итминони комил дорем, ки кормандони соҳаи тиб дар соли бузургу таърихӣ — 25-умин солгарди Истиқлолияти давлатии Ҷумҳурии Тоҷикистон дастовардҳои худро бештар намуда, баҳри саломатии инсон ва ояндаи неки ӯ меҳнати шоиста менамоянд.

Медиапортали «Тироз» ҳамаи кормандони соҳаи тибро бо Иди касбиашон табрик намуда, барояшон саодати рӯзгор, некномиву сарбаландӣ хоҳон аст!

                                                                                Исломҷон Бобоев

НЕТ КОММЕНТАРИЕВ

ОСТАВЬТЕ ОТВЕТ

Лимит времени истёк. Пожалуйста, перезагрузите CAPTCHA.