Шумораи театрҳо дар Ҷумҳурии Тоҷикистон боз ба як адад зиёд шуд. Он ҳам бошад, дар Шимоли Тоҷикистон, ноҳияи Ашти бостон.
Дар ноҳияи Ашти вилояти Суғд Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон дар Боғи ба номи Маҳмудҷон Воҳидов бинои нави Кохи фарҳангро ба истифода дод.
Зимни шиносоӣ аз иншооти нави фарҳангӣ ба Сарвари давлат Эмомалӣ Раҳмон иттилоъ доданд, ки сохтмони Кохи фарҳанги ноҳия моҳи марти соли 2014 аз ҷониби Идораи сохтмони асосии вилоят оғоз гардида, маблағи умумии сохтмони бино ба 12 миллион сомонӣ баробар мебошад.
Кохи фарҳанг 2 — ошёна буда, аз толори асосӣ бо 800 ҷойи нишаст, ҳуҷраҳои корӣ, толорҳои хурди машқӣ, толори маҷлис ва таҳхона иборат мебошад. Бино бо истифода аз санъати меъмории миллӣ ороиш дода шуда, намои асосии он аз 18 сутун ва дарҳои кандакорӣ иборат аст. Пештоқи болои бино бо мусаввараҳои гуногун ва шифту деворҳои толори асосӣ бо истифода аз гаҷкорию кандакорӣ хеле зебою назаррабо сохта шудааст.
Дар саҳни ҳавлии Кохи фарҳанг ду фаввора бо чароғҳои ранга ҷойгир карда шуда, гирду атрофи майдон ва ҳудуди боғи фарҳангии ба номи Маҳмудҷон Воҳидов бо дарахтон, гулу гулбуттаҳо ва таҷҳизоти муосири равшанидиҳӣ ороиш дода шудааст.
Дар Кохи фарҳанги ноҳия, ки акнун макони баргузории чорабиниҳои гуногуни фарҳангӣ мегардад, Сарвари давлат Эмомалӣ Раҳмон ба кори сохтмончиён ва устоҳои гулкор баҳои баланд дод.
Дар толори барҳавои Кохи навбунёди фарҳанг, ки бо нақшу нигори миллӣ, санъати зебои меъморӣ ва қандилҳои равшан хеле зебо сохта шудааст, ҳаваскорони ноҳияи Ашт ва гурӯҳи занони хонанишини ҳунарманд барномаи рангини консертиро пешкаши Сарвари давлат Эмомалӣ Раҳмон ва меҳмонон карданд.
Пас аз тамошои барнома Президенти мамлакат Эмомалӣ Раҳмон ба сатҳи баланди ҳунарнамоии ҳаваскорон, баҳри таҳия ва пешкаш кардани консерти хубу хотирмон, баҳои арзанда дод.
Пешвои миллат Эмомалӣ Раҳмон ба ҳунари бонувони хонанишин, ки ягон шароити мусоиди эҷоди рақсу барномаҳои ҳунарӣ надоранд ва бисёр бомаҳорат баромад карданд, аҳсану офарин хонд.
Сарвари давлат ба кормандони Кохи фарҳанги ноҳияи Ашт 1 адад пианино, 25 адад асбобҳои гуногуни мусиқӣ ва дастгоҳи тақвияти овоз тақдим кард.
Президенти мамлакат пешниҳод кард, ки аз ин пас ин даргоҳи санъату зебоӣ на Кохи фарҳанг, балки ба Театри мусиқӣ – драмавӣ табдил дода шавад. Ба роҳбарияти вилоят супориш дод, ки барои ба Театри мусиқӣ — драммавӣ табдил додани Кохи фарҳанг боз 60 воҳиди корӣ ҷудо намуда, тадбирҳо андешанд.
Ба андешаи Эмомалӣ Раҳмон акнун аҳли ҳунар метавонанд бо истифода аз ин толори хуштарҳу зебо барномаҳои ҷолиб омода ва пешкаши ҳаводорони санъати асил намоянд. Сарвари давлат устодони санъатро ба тарбияи шогирдон, дарёфти истеъдодҳои нав ва ривоҷи ҳунарҳои мардумӣ ҳидоят кард.
Дар саҳни ҳавлии Театри мусиқӣ-драмавӣ Президенти мамлакат Эмомалӣ Раҳмон бо аҳли фарҳанг ва дигар сокинони ноҳия, ки барои истиқболи Пешвои миллат ва сӯҳбат бо Сарвари хеш ҷамъ омада буданд, мулоқоти самимӣ орост.
Зимни баромади худ сокинони ноҳия ба Пешвои ғамхори хеш Эмомалӣ Раҳмон барои ҳамаи талошҳову ташаббусҳои созанда сипосгузорӣ карданд.
Инак, аз ин пас ноҳияи Ашт соҳиби театри замонавию муосири хеш гардид ва дар Тоҷикистони соҳибистиқлол боз як театр бо номи «Театри мусиқӣ-драмавӣ» арзи ҳастӣ намуд.
Нет комментариев