“ТИРОЗ” – Мактаби хуби омодакунии мутахассисони ҷавон

0
172 просмотров

Хонандагони арҷманди Медиапортали “Тироз”, ҳамон тавре хуб огоҳӣ доред, соли 2016 барои Радиои “Тироз”, ки яке аз маҳбубтарин шабакаҳои радиоӣ дар Тоҷикистони соҳибистиқлол ба шумор меравад, соли таърихиву ҷашнӣ аст. Зеро, дар рӯзи нахустини фасли зебои сол – Баҳори хуҷаставу фаррухпай – санаи 1-уми март ба таъсисёбиву пахши нахустин барномаи Радиои “Тироз” 15 сол пур шуд. Аз ин лиҳоз, тамоми сол мо – роҳбарият ва кормандони ин даргоҳи муқаддаси фарҳангу зебоӣ ва қабл аз ҳама, шунавандагони мӯҳтарами барномаҳои Радиои “Тироз” басо шоду масрур ҳастем.

С.Юнусов-2

Таҳия ва пешниҳоди силсиламаводи хешро дар бораи ҳаёту фаъолияти кормандони дирӯзу имрӯзи радио идома медиҳем. Ин навбат доир ба давраи фаъолияти собиқ Директори барномаҳои Ширкати телевизион, радио ва рекламавии “Тироз” Сарфароз Юнусов, ки имрӯз дар вазифаи бисёр масъулиятнок, Раиси Кумитаи иҷроияи вилояти Суғдии Ҳизби халқии демократии Тоҷикистон кор мекунад ва номзади илмҳои филология аст, маводи ҷолиберо пешкаши Шумо намудем.

Бо ин ҳадаф ба Сарфароз Юнусов бо чанд савол муроҷиат намуда, посухҳои қаноатбахш ва ҷолибу хотирмон гирифтем.

Инак мутаваҷҷеҳ бошед ба мусоҳибаи мо:

  1. Шумо чӣ тавр ва дар кадом сол барои фаъолият кардан ба Радиои “Тироз” омада будед?

Бо даъвати Директори генералии Ширкати телевизион, радио ва рекламавии “Тироз” инсони кордону фидоии меҳнат, ғамхору дилсӯз Хуршед Азимҷонович Ӯлмасов соли 2009 барои фаъолият ба ин даргоҳ омадам ва ба кор пардохтам.

  1. Чаро маҳз фаъолиятро дар Радиои “Тироз” интихоб намудед?

С.Юнусов-4

Барои он ки дар ин ширкат муҳити солим ва озоди эҷодӣ фароҳам оварда шуда буд. Барои таҳияву пахши барномаҳои мухталиф аз рӯи жанр ва мавзӯъҳо барои кормандони радио тамоми шароити зарурӣ муҳайё гардида буд. Инро аз рӯзҳои нахустини фаъолиятам ба хубӣ эҳсос менамудам. Яъне, роҳбарияти радио пайваста нисбат ба пешрафти кор ва таҳияи маводҳои ҷолибу шуниданӣ кӯшиш мекард.

  1. Кадом лаҳзаҳои хотирмон солҳои фаъолиятатон дар радио, дар хотиратон нақш бастааст?

Лаҳзаҳои хотирмон зиёданд, махсусан барои эҷодкор ҳар як натиҷаи маҳсули эҷодияш фаромӯшношуданист. Дар ман низ чунин хотирот зиёд аст. Таҳия ва рӯзи ба мавҷ баровардани барномаву гуфторҳо тавассути Радиои “Тироз” лаҳзаҳои ҳаяҷоновар ва хотирмон маҳсуб мешаванд.

  1. Барои худи Шумо аз ҳама шавқовару завқовар дар солҳои фаъолиятатон дар Радиои “Тироз” чӣ буд?

Рӯзҳои аввали фаъолият, ошноӣ бо аҳли эҷод. Зеро, дар ин давра чун имрӯз дар радио шахсони фидоии кор, дӯстдори эҷодиёт ва масъулиятшиносу қобили меҳнат фаъолият мекарданд. Ифтихор дорам, ки бо онҳо дар паҳлӯи ҳамдигар ва дар якҷоягӣ кор кардаам.

Маълумоти боз ҳам шавқовару хотирмон:

С.Юнусов-1

Сарфароз  Юнусов

  • Аз рӯи толеънома (гороскоп) –  Сумбула
  • Хӯроки дӯстдошта –  Оши палав
  • Фасли писандида –  Баҳор
  • Гули дӯстдошта –  Садбарг
  • Ранги писандида –  Зард
  • Рақами дӯстдошта –  13
  • Аз рӯи мучал (тақвими шарқ) –  Мурғ
  • Радио ва ё телевизиони дӯстдошта –  Тироз, Ретро ФМ, МАТЧ ТВ
  1. Шумо чанд сол қабл дар ин радио фаъолият карда будед? Тафовути дирӯзу имрӯзи радиоро эҳсос ё мушоҳида менамоед (ҳам дар бахши эҷодӣ ва ҳам дар бахши техникӣ)?

С.Юнусов-5

Ман 6 сол қабл дар ин ширкат фаъолият доштам ва тайи ин солҳо дигаргуниҳои зиёдро мушоҳида кардам ва карда истодаам. Сатҳу сифати барномаҳо ба талаботи замон мувофиқ гардидаанд. Махсусан, ривоҷ ёфтани бисёррасонаӣ дар ин ширкат боиси дастгирист. Фаъолгардии Медиапортал мувофиқи мақсад аст.

  1. Агар Шуморо боз барои кор дар Радиои “Тироз” даъват мекарданд, розӣ мешудед?

Не. Ман мехоҳам барои ҷавонон майдони эҷоду фаъолият фарохтар бошад. Бигзор акнун “Тироз” ҳамқадам бо ҷавонони имрӯза пеш равад.

  1. Ба Мактаби “Тироз” чи гуна баҳо медиҳед?

С.Юнус

Давоми 15 соли фаъолияташ ШТРР “Тироз” воқеан ҳам, ба мактаби хуби омодакунии кадрҳои ҷавон дар соҳаи радио ва телевизион табдил ёфтааст. Дастпарварони ин мактабро дар зинаҳо ва сохтору идораҳои мухталиф дучор мешавем. Ин ҳама заҳмату дилсӯзӣ ва ғамхориву дастгирии роҳбарияти ин даргоҳи муқаддас, яъне, Директори генералии Ширкати телевизион, радио ва рекламавии “Тироз” Хуршед Азимҷонович Ӯлмасовро нисбат ба кормандон исбот мекунад.

Ташаккур барои сӯҳбати самимӣ ва хотирмон, ҳамеша саломату саодатманд ва дар фаъолияту зиндагӣ муваффақ бошед!

                                               Сӯҳбатнигор  Исломҷон Бобоев

Нет комментариев

Также рекомендуем

Имрӯз Мутрибахон «Ҳамроз»-бар шуданд…

“Ҳамроз” барномаи интерактивӣ бо шунавандагон буда, дар ду бахш сурат мегирад: бахши аввал доир ба техникаву технология буда,  бахши дигар бозиҳои ҷолиб (ба монанди дарёфтани ...