Дар маҷлисгоҳи хурди Мақомоти иҷроияи ҳокимияти давлатии вилояти Суғд таҳти раёсати Раиси вилоят Раҷаббой Аҳмадзода машварати корӣ баргузор гардид.
Дар машварати кории назди Раиси вилоят муовини якуми Раиси вилоят, муовинони Раиси вилоят, раисони як қатор шаҳру ноҳияҳо, роҳбарони сохторҳои Мақомоти иҷроияи ҳокимияти давлатии вилояти Суғд, ректорони донишгоҳу донишкадаҳо ва дигар шахсони масъул ҳузур доштанд.
Раиси вилоят Раҷаббой Аҳмадзода машварати кориро оғоз бахшида, қайд намуд, ки дар асоси дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вилоят ба корҳои ободониву созандагӣ таваҷҷуҳи хоса равона гардида, барои сазовор истиқбол гирифтани санаҳои муҳими таърихӣ ва ҷашнҳои миллӣ омодагии ҳамаҷониба дида мешавад.
Сипас, муовинони Раиси вилоят оид ба вазъи соҳаҳои зери сарпарастиашон қарордошта гузориш доданд. Аз ҷумла, муовини якуми Раиси вилоят Рустам Раҳматзода зимни ироаи гузориши худ иттилоъ дод, ки дар асоси супориши роҳбарияти вилоят дар ҳамаи шаҳру навоҳӣ ҷиҳати оммавияти варзиш чораҳои зарурӣ андешида мешавад. Дар ин замина то ба ин дам беш аз 50 майдончаи варзишӣ мавриди истифода қарор гирифта, то охири сол боз зиёда аз 50 майдончаи варзишӣ ба истифода дода мешавад. Вобаста ба масъалаи таҳсили ғайрирасмии ҷавонон дар хориҷи кишвар ва бозгардонидани онҳо таваҷҷуҳи бештар равона гардида, зарур дониста шуд, ки роҳбарони шаҳру навоҳӣ ва сохторҳои марбута дар ҳамкорӣ бо мардум дар ин самт фаъолияти назаррас нишон бидиҳанд.
Муовини Раиси вилоят Анвар Яъқубӣ оид ба вазъи имрӯзаи соҳаи саноат, масъалаи босифат иҷро нагардидани нақшаи андозҳо дар бархе аз шаҳру навоҳӣ маълумот дод. Раиси вилоят Раҷаббой Аҳмадзода аз пурра истифода нагардидани иқтидорҳои мавҷудаи соҳаи саноат дар вилоят, таъмин нагардидани нақшаи андозҳо дар бархе аз шаҳру ноҳияҳо, иҷро нашудани уҳадориҳо аз ҷониби баъзе аз корхонаҳои саноатӣ изҳори нигаронӣ намуда, дастур дод, ки минбаъд моҳе як маротиба фаъолияти соҳаҳои иқтисоду саноат мавриди таҳлилу омӯзиш қарор дода шавад.
Аз ҷониби Раиси вилоят супориш дода шуд, ки маҳсулоти саноатӣ, хӯрока ва ҳунарҳои мардумӣ бо тарзи замонавӣ бастабандӣ гардида, содироти он ба кишварҳои хориҷӣ ба роҳ монда шавад. Дар “Соли рушди сайёҳӣ ва ҳунарҳои мардумӣ” беҳтар намудани сатҳи хизматрасонии ошхонаву тарабхонаҳо ва меҳмонхонаҳо мувофиқи мақсад дониста шуд.
Дар машварати корӣ вобаста ба рафти кишти такрорӣ, нашъунамои пахта дар саҳро, омодагии корхонаҳои коркарди пахта ба мавсими нав, захира намудани маҳсулоти кишоварзӣ дар сардхонаҳо, фаъолияти мунтазами гармхонаҳо ва дигар масъалаҳои соҳаи кишоварзӣ муовини Раиси вилоят Ориф Хоҷазода ҳисобот дод.
Раиси вилоят Раҷаббой Аҳмадзода дар хусуси зарурати гузаронидани кишти такрорӣ ва рӯёнидани ҳосили дилхоҳ таваҷҷуҳи бештар намуда, дастур дод, ки то санаи 15 август дар майдони бештар аз 16 ҳазор гектар кишти такрорӣ гузаронида шавад. Яке аз масъалаҳои дигари ин соҳа, ки ба он таваҷҷуҳи бештар зоҳир гардид, ин рушди занбӯрпарварӣ дар вилоят мебошад. Дастур дода шуд, ки шумораи оилаи занбӯри асал аз 52 ҳазор ба 100 ҳазор оила ва истеҳсоли асал аз 1350 то ба 2500 тонна расонида шавад.
Ба масъулини соҳаи кишоварзӣ вобаста ба самаранок истифода намудани гармхонаҳо, зиёд намудани ҳаҷми истеҳсоли помидору бодиринг, захираи маҳсулоти кишоварзӣ дар сардхонаҳо, зиёд намудани майдони боғот, омодасозии техника барои пахтачинӣ ва андешидани тадбирҳо барои беталаф ҷамъоварӣ намудани ҳосили пахта, ташкили мунтазами ярмарка-фурӯши маҳсулоти кишоварзӣ дар шаҳру навоҳии саноатӣ то ҷашни Истиқлолияти давлатӣ супоришҳои мушаххас дода шуд.
Омодагӣ ба мавсими тирамоҳу зимистони солҳои 2018-2019 аз масъалҳои муҳими соҳаҳои маорифу тандурустӣ ба шумор меравад. Муовини Раиси вилоят Назира Ғаффорӣ оид ба ин ва дигар масъалаҳои соҳаи иҷтимоиёт гузориш дод. Масъулини соҳаи маориф, раисони шаҳру навоҳӣ ва дигар шахсони масъулро зарур аст, ки то 20 август таъмир ва омодагӣ ба соли хониши навро дар муассисаҳои таълимӣ ба пуррагӣ анҷом бидиҳанд. Тибқи дастури роҳбари вилоят захираи ангишт бояд аз ҳисоби корхонаҳои истеҳсоли ангишти ватанӣ ба роҳ монда шуда, эҳтиёҷоти муассисаҳои соҳаҳои маорифу тандурустӣ дар муҳлати пешбинишуда қонеъ гардонида шавад.
Раиси вилоят Раҷаббой Аҳмадзода изҳор дошт, ки соли 2020 санаҳои таърихӣ, аз ҷумла 5500-солагии Саразм, 700-солагии шоири номвари тоҷик Шайх Камоли Хуҷандӣ ва иди Ваҳдати миллӣ дар шаҳрҳои Панҷакенту Хуҷанд ва ноҳияи Мастчоҳ ҷашн гирифта мешавад. Дар робита бо ин ба раисони шаҳру навоҳӣ, сохторҳои дахлдор ҷиҳати омодагӣ гирифтан ба таҷлили шоистаи ҷашнҳо супоришҳои мушаххас дода шуд. Ҳамзамон, ҷиҳати вусъат бахшидан ба корҳои ободониву созандагӣ ба истиқболи 30-солагии Истиқлолияти давлатӣ масъулин вазифадор карда шуданд.
Машварати кории назди Раиси вилоят бо тарҳрезии нақшаи фаъолият барои давраи минбаъда ҷиҳати расидан ба дасторвадҳои назаррас ба анҷом расид.
Манбаъ: Хадамоти матбуоти Раиси вилояти Суғд
Нет комментариев