Ташрифу табрикоти дӯстону ҳамкорони мо ба ифтихори ҷашни 15-солагии Радиои “Тироз” идома дорад.
Бо мақсади муборакбодии роҳбарият ва ҷомеаи меҳнатии Ширкати телевизион, радио ва рекламавии “Тироз” намояндагони Ширкати маъруфи “Тсell” ба ин даргоҳи иттилооту фарҳанг омаданд.
Сарвари кулли ШТРР “Тироз” Хуршед Азимҷонович Ӯлмасов меҳмононро пешвоз гирифта, ба Кошонаи меҳру садоқат ва дӯстиву вафодорӣ хайра мақдам гуфт.
Меҳмонон дар шахсияти Директори Филиали Суғдии ҶСП “Индиго Тоҷикистон” Нурматов Ҷаъфар Насриддинҷонович ва коршиноси Департаменти коммуникатсия ва идоракунии брендҳои Ширкати “Тсell” Рустам Мирсаидов роҳбарият ва кулли кормандони эҷодӣ ва техникии Радиои “Тироз”-ро аз номи худ ва ҳамаи коркунони Филиали Суғдии ҶСП “Индиго Тоҷикистон” самимона табрик намуданд. Таманнои онро карданд, ки бигзор ШТРР “Тироз” ҳамеша дар фаъолият муваффақ бошад, кораш барор гирад ва дар дилу дидаи шаҳрвандон-мухлисону дӯстдорони сершумори худ бошад. Боз 15-солаҳои дигар барои шунавандагони маҳбубаш хизмат карда, бо барномаҳои ҷолибу шуниданбоб маърифату маданияти мардумро баланд бардорад.
Тӯҳфаи арзандаи меҳмонон тақдими “СЕРТИФИКАТ” буд, ки бо имзои худи Директори генералии “Тсell” Миндаугас Убартас тайёр шуда буд ва дар он омадааст: «“Сертификат” дода шуд ба ҳамкори беҳтарин ва боэътимод — Радиои “Тироз” барои ҳамкории бисёрсола ва манфиатовар, касбияти баланд ва саҳми бузург дар ҳамкориҳо бо Ширкати “Тсell”!»
Зимни сӯҳбати дӯстона доир ба ҳамкории ин ду ширкати бузург, ки дар ҳақиқат ҳамзамону ҳамсолу ҳамқадаманд, сухан рафт. Зикр гардид, ки Ширкатҳои “Тсell” ва “Тироз” дар як вақт таъсис ёфтаву барои мардум хизмати шоёни таҳсин ва олӣ мерасонанд. Аниқтараш аввал Ширкати “Тсell” ва баъдан Ширкати “Тироз”. Яъне, чун ду бародар, пешу қафо таъсис ёфтаанд.
Сарвари кулли ШТРР “Тироз” Хуршед Ӯлмасов бо хушнудӣ зикр намуд, ки тӯли 15 соли мавҷудияташ Радиои “Тироз” бо Ширкати “Тсell” дар таҳияву ба мавҷ баровардани барномаҳои худ ҳамкориву ҳамдастӣ менамояд. Бахусус, “Тсell” солҳои охир ҳамкори лоиҳаи барномаҳои интерактивии радиоии “Ҳоҷирҷавоб” ва “Ҳамроз” мебошад.
Ҳамчунин, шурӯъ аз моҳи марти соли равон Ширкати “Тсell” ҳамкори лоиҳаи мултимедиявии “Матритса”, ки онро кормандони ШТРР “Тироз” пурра таҳия ва пешкаши аудитория мекунанд, ба ҳисоб меравад.
Дар охир барои меҳмонони азизу арҷманд, ҳамкори кулли барномаҳои Радиои “Тироз” — Ширкати маъруфи “Тсell” барои табрикоти самимона ва тӯҳфаи олӣ “Сертификат”-и “Тсell” арзи сипос менамоем.
Ҷашни 15-солагии Радиои “Тироз” идома дорад!
Нет комментариев