Боришоти зиёд дар шаҳру ноҳияҳои Тоҷикистон ва гармшавии ҳарорати ҳаво сабаби фаромадани тарма ва сангрезӣ гардида, дар шоҳроҳҳои «Душанбе-Рашт-Лахш», «Душанбе-Чаноқ», «Шамсиддини Шоҳин-Ванҷ» ва «Хоруғ-Ишкошим» вазъият нигаронкунанда боқӣ мондааст. Дар ин бора АМИТ «Ховар» бо истинод ба маркази матбуоти Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар медиҳад.
Ба иттилои манбаъ, шабонарӯзи гузашта дар шоҳроҳи «Душанбе — Чаноқ» (аз километри 54 то 84) 17 ҳолат ва дар қитъаи роҳи мошингарди «Нуробод — Сангвор» якчанд ҳолати тармафароӣ ба қайд гирифта шуданд.
Хадамоти роҳнигоҳдории Вазорати нақлиёти Ҷумҳурии Тоҷикистон ва ширкати IRS барои бартараф кардани ҳолатҳои мазкур техникаҳои махсус ҷудо намуданд. Айни замон қисмати роҳи мошингарди «Нуробод — Сангвор» тоза ва ҳаракати нақлиёт таъмин карда шуд. Инчунин ҳоло дар шоҳроҳи «Душанбе -Чаноқ» корҳо идома дошта, ҳаракати нақлиёт дар наздиктарин фурсат таъмин карда мешавад.
Барои таъмини бехатарии ҳаракати ронандагон дар роҳҳо ва расонидани кумакҳои фаврӣ дар ҳолати кунунӣ дар қитъаҳои мухталифи шоҳроҳҳо наҷотдиҳандагони Кумитаи ҳолатҳои фавқулода ва мудофиаи гражданӣ кор бурда истодаанд.
Дар робита ба ин Кумитаи ҳолатҳои фавқулода аз шаҳрвандон хоҳиш мекунад, ки аз сафар дар роҳҳои кӯҳӣ худдорӣ намуда, хеле эҳтиёткор бошанд.
Ёдовар мешавем, ки дар ҳолати сар задани ҳолатҳои фавқулода ва ё ҳолати ногувор дар роҳҳои мошингарди ҷумҳурӣ шаҳрвандон метавонанд бо телефонҳои боварии 112, 93 880 28 19 ва ё 223 13 11 бо қисмҳои навбатдории Кумитаи ҳолатҳои фавқулода ва мудофиаи гражданӣ дар тамос шаванд.
Манбаъ: АМИТ «Ховар»
Нет комментариев