Қадршиносӣ аз варзишгарони тоҷик

0
131 просмотров

Ҳар сол 10 август дар миқёси кишвар қайд гардидани Рӯзи варзишгарон нишони эътибори беназири Сарвари давлат ва Ҳукумати мамлакат ба варзиш ва таъмини бақои ҷавонӣ аст.

Бо ғамхорию назари неки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон соли 2017 Соли ҷавонон эълон гардида, шароити хуб барои ояндагони кишвар фароҳам шуда истодааст. Майдончаҳои варзишӣ бо намудҳои гуногун ба истифода дода мешаванд. Ин имконияти васеъро барои машқу тамрин фароҳам меорад. Имрӯз ҷавонписарону ҷавондухтарони тоҷик дар баробари таҳсил дар муассисаҳои таълимӣ ба варзиш машғул ҳастанд.
Шаҳри Хуҷанд дорои варзишгоҳи боҳашамат бо 25 ҳазор ҷойи нишаст, 6 варзишгоҳи дигар бо теъдоди 5 ҳазор ҷойи нишаст, майдончаи варзишӣ, толори варзишӣ, ҳавзҳои шиноварӣ, мактаби варзишии бачагону наврасон мебошад. Ин ҳама имконият медиҳад, ки сокинони шаҳр новобаста аз синну сол ба намудҳои гуногуни варзиш машғул гарданд, таҳти назари мураббиёни соҳибтаҷриба нозукиҳои варзишро аз худ намоянд.


Варзиш як воситаест, ки касро ҷисман ва рӯҳан пурқувват мекунад, намегузорад, ки ба корҳои беҳуда машғул гардад. Варзишро қосиди сулҳ мегӯянд, ки барҳақ аст.
Дастхобонӣ яке аз намудҳои варзиш маҳсуб меёбад. Бо он ҷавони қавиирода, болаёқат Ҷонибек Қодиров машғул аст. Ӯ зодаи шаҳри Хуҷанд буда, МТМУ №23-юми шаҳрро хатм намудааст. Аввалҳо ӯ бо каратэ-до машғул буд, баъдан соли 2012-ум бо маслиҳати модараш ба ин намуди варзиш майл кард. Ин ҷавони рӯҳан қавӣ нозукиҳои ин намуди варзишро аз устодонаш Абдукарим ва Зарифҷон Қӯзиевҳо хеле хуб омӯхта, ба муваффақиятҳо ноил гардид. Дар мусобиқаҳои байналхалқӣ иштирок намуда, байрақи Тоҷикистонро баланд бардошт. Ӯ номзади устоди варзиш, дорандаи зиёда аз 20 медал, дорои камарбанди сиёҳ ва ҷигарӣ, ғолиби Ҷоми ҷаҳонӣ дар 2015-ум, Чемпиони Осиё оид ба дастхобонӣ дар соли 2017-ум мебошад, ки ин мояи ифтихори мардуми тоҷик мебошад.
-Кас якбора ба чунин комёбиҳо ноил намегардад. Натиҷаи завқ, машқ, истодагариҳо, иродаи мустаҳкам, рӯҳияи баланд боис мешавад, ки кас ба чунин комёбиҳо муваффақ шавад.

Хушбахтона, Ҳукумати ҷумҳурӣ имрӯз барои густариш додани соҳаи варзиш назари хоса зоҳир намуда, корҳои заруриро дар ин самт роҳандозӣ намудааст. 21-22-юми августи соли равон Чемпионати кушоди вилоятӣ баргузор мешавад ва ман ният дорам, ки дар ин мусобиқа иштирок намояму сазовори ҷои ифтихорӣ гардам, -мегӯяд Ҷонибек Қодиров.
Имрӯз ӯ дар назди худ мақсад гузоштааст, ки ба наврасон нозукиҳои ин намуди варзишро омӯзонад. Як насли нави варзишгарони тоҷикро омода намояд, то ки онҳо дар оянда мисли устоди худ дар мусобиқаҳои байналхалқӣ иштирок намуда, Тоҷикистонро дар арсаи ҷаҳонӣ муаррифӣ намоянд.
Варзиш як намуди фаъолияти ҷисмонӣ ва интеллектуалӣ мебошад. Барои беҳтар намудани саломатӣ, барои ба даст овардани қаноатмандии молӣ ва маънавӣ, пешравӣ ва беҳбудии тавоноӣ хизмат мекунад, -арз кард Ҷонибек ҳини сӯҳбат.
Боварӣ дорем, ки Ҷонибек ва шогирдонаш минбаъд низ дар мусобиқа ва чемпионатҳои бонуфузи ҷаҳонӣ иштирок намуда, миллати тоҷикро ба арсаи ҷаҳонӣ муаррифӣ мекунанд.

Нет комментариев

Также рекомендуем

Имрӯз – Рӯзи умумиҷаҳонии туризм

Сайёҳон торафт бештар ҷозибаи Тоҷикистонро эҳсос менамоянд! «Сайёҳӣ ё худ туризм дар сиёсати имрўзаи Ҳукумати кишвар бо дарназардошти захираҳои бузурги табиӣ — рекреатсионӣ ва мероси ...