Дар шаҳри Бишкеки Қирғизистон ба ифтихори қаҳрамони олимпӣ Татяна Колпакова мусобиқаи анъанавӣ оид ба варзиши сабук баргузор шуд. Дар он 320 нафар варзишгарон аз ҷумҳуриҳои Тоҷикистон, Қазоқистон, Қирғизистон, Озарбойҷон ва Ӯзбекистон иштирок карданд. Дар мусобиқа варзишгарони тоҷик сазовори 8 медал гардиданд.
Ба иттилои сармураббии дастаи мунтахаби Тоҷикистон Ғайрат Неъматов, варзишгарони мо дар ин мусобиқа 3 медали тилло, 2 нуқра ва 3 биринҷӣ ба даст оварданд.
Кристина Пронженко дар қувваозмоии дав ба масофаи 400 метр бо монеа миёни занон (1.00,08), Григорий Дерепаскин дар қувваозмоии дав ба масофаи 400 метр миёни мардон соҳиби медали тилло гардиданд.
Дастаи мардонаи варзиши сабуки кишвар дар ҳайати Даврон Атабоев, Григорий Дерепаскин, Алишер Пулотов, Исломҷон Холиқов дар эстафетаи 4х400 (3.20,01) ҷои аввалро ишғол кард.
Медалҳои нуқраро Кристина Пронженко дар қувваозмоии дав ба масофаи 400 метр миёни занон (55,02) ва дастаи занонаи кишвар дар ҳайати Кристина Пронженко, Меҳрангез Назарова, Нодира Мирзоева, Гулсунбӣ Шарифова дар эстафетаи 4х400 (4.11,97) сазовор шуданд.
Одилшоҳ Исматов дар қувваозмоии дав ба масофаи 800 метр миёни мардон (1.51,88), Алишер Пулотов дар дав ба масофаи 400 метр бо монеа миёни мардон (54,11) ва дастаи мардон дар ҳайати Фавориз Музрапов, Григорий Дерепаскин, Илдар Ахмадиев, Даврон Атабоев дар эстафетаи 4х100 метр (42,14) соҳиби медали биринҷӣ гардиданд.
Ёдовар мешавем, ки дастаи мунтахаби варзиши сабуки Тоҷикистон дар Ҷоми кушоди Ӯзбекистон оид ба варзиши сабук, ки 9-10 июн дар шаҳри Тошканд доир гашт, сазовори 12 медал (3 тилло, 4 нуқра, 5 биринҷӣ) шуда буд.
Манбаъ: Сомонаи АМИТ «Ховар»
Нет комментариев