Вохӯрӣ оид ба ҳамкории байни ВАО-и шаҳри Лянюнгани Чин ва панҷ кишвари Осиёи Марказӣ

0
135 просмотров

Дар «Маркази байналмилалии ҳамкорӣ»-и наздисарҳадии шаҳри Хоргоси Ҷумҳурии мардумии Чин ва Қазоқистон, маросими баимзорасонии созишнома оид ба ҳамкорӣ ва чорабинии «Истиқболи Соли нав дар Шоҳроҳи Абрешим» байни Радио ва телевизиони гурӯҳи медиавии шаҳри Лянюнгани Чин ва ВАО-и панҷ кишвари Осиёи Марказӣ баргузор гардид.

Дар чорабинӣ роҳбарон ва меҳмонони зиёде аз шабакаҳои радио ва телевизионҳои шаҳри Лянюнгани Чин ва панҷ кишвари Осиёи Марказӣ иштирок намуданд. Дар радифи дигар воситаҳои ахбори омма, вобаста ба иштироки фаъолона ва иҷроиши лоиҳаҳо бо ташкилоту созмонҳои байналмилалӣ, бахусус «Открытая Азия онлайн», «Новый репортёр» ва ғайра – Ширкати телевизион, радио ва рекламавии «Тироз» ба ин чорабинии бошукӯҳи фарҳангиву маърифатӣ даъват шуд. Ҳамин тавр, бо намояндагӣ аз радио ва телевизионҳои Ҷумҳурии Тоҷикистон  Директори генералии Ширкати телевизион, радио ва рекламавии «Тироз» Хуршед Ӯлмасов дар ин чорабинӣ бевосита иштирок намуд.

Сараввал сардори раёсати Радио ва телевизиони Гурӯҳи медиавӣ, роҳбари телевизиони шаҳри Лянюнган Гао Лансзюн ҷамъомадагонро хайрамакдам гуфта, зикр намуд, ки чорабинии мазкур бо ҳадафи рушди рӯҳияи Шоҳроҳи Абрешим ва ҳавасмандгардонии бунёди «Як минтақа ва як роҳ», ташаккули муоширати мардумони давлатҳои Чин, Қазоқистон, Қирғизистон, Тоҷикистон, Туркманистон ва Ӯзбекистон баргузор мегардад.

Ҳамзамон пешниҳоди консепсияи рушди ҳамкории муштараки манфиатовар ва маросими баимзорасонии созишнома оид ба ҳамкорӣ дар шоми «Истиқболи Соли нав дар Шоҳроҳи Абрешим — 2019» байни Радио ва телевизиони гурӯҳи медиавии шаҳри Лянюнгани Чин ва ВАО-и панҷ кишвари Осиёи Марказӣ доир мегардад.

Директори генералии Ширкати телевизион, радио ва рекламавии «Тироз» Хуршед Ӯлмасов дар қатори намояндагони телевизионҳои кишварҳои дигари Осиёи Марказӣ баромад карда, қайд намуд, ки Тоҷикистон алҳол саҳми худро барои рушди Шоҳроҳи Абрешим ҳаматарафа гузошта истодааст. Ба хотири пайванди бештар бо роҳҳои тиҷоратӣ, аз ҷумла роҳҳои воқеъ дар Роҳи қадимии Абрешим, дӯстии халқҳо, ошноии мардумон бо фарҳангу урфу одати ҳамдигар барномаҳое амал мекунанд.

Муовини директори генералии Радио ва телевизиони Гурӯҳи медиавии шаҳри Лянюнган Ван Зилӣ даъват карда шуд, то бо ҳамроҳии намояндагони телевизионҳои панҷ кишвари Осиёи Марказӣ ба созишнома имзо гузоранд.

Ҳамин тавр, маросими имзогузорӣ ба созишнома баргузор гардид ва бо навбат намояндагони ҷумҳуриҳои бародар даъват карда шуданд. Бахусус, намояндаи телевизиони «AGROBUSINESS-TV»-и Қазоқистон, намояндаи Радио ва телевизиони «Манас»-и Қирғизистон, намояндаи телевизиони «ZOR-TV»-и Ӯзбекистон, намояндаи Радио ва телевизиони «TIROZ»-и Тоҷикистон ва намояндаи телевизиони Туркманистон  ба созишнома имзо гузоштанд.

Дар ҷамъбаст намояндаи мақомоти шаҳри Лянюнган Тынг Вын сухан карда, баён намуд, ки «Истиқболи Соли нав дар Шоҳроҳи Абрешим» — пули фарҳангии наздисарҳадие бунёд менамояд, ки ба навгонии бузург дар самти мубодилаи фарҳанг дар байни кишварҳои «Як минтақа ва як роҳ» асос мегузорад. Қайд кардан зарур аст, ки ин чорабинӣ тавассути шабакаҳои телевизионии шаҳри Лянюнган ва телевизионҳои панҷ кишвари Осиёи Марказӣ бо тарҷума ба панҷ забон намоиш дода мешавад ва дар он имкониятҳои пайвастагии фарҳанги шаҳри Лянюнган бо панҷ кишвари Осиёи Марказӣ инъикос мегарданд.

Дар идомаи чорабинӣ шаҳри Лянюнган ва телевизионҳои панҷ кишвари Осиёи Марказӣ армуғонҳои хешро иваз намуданд. Узви Кумитаи доимӣ, сардори шӯъбаи ташвиқоту тарғиботи Кумитаи шаҳрии Ҳизби коммунисти Лянюнган Тынг Вын ба панҷ ВАО-и кишварҳо кураи булӯрини баҳри Шарқии Хитойро тақдим намуд.

Намояндаи Тоҷикистон Хуршед Ӯлмасов армуғони зебою нотакрори хешро, иборат аз маҳсули меҳнати ҳунармандони мардумии Тоҷикистон, барои мизбонону меҳмонон пешкаш кард. Зеро соли 2018 дар Тоҷикистон – «Соли рушди сайёҳӣ ва ҳунарҳои мардумӣ» эълон шудааст.

Бо ҳамин маросими баимзорасии созишнома оид ба ҳамкорӣ ва «Истиқболи Соли нав дар Шоҳроҳи Абрешим» байни Радио ва телевизионҳои гурӯҳи медиавии шаҳри Лянюнгани Ҷумҳурии мардумии Чин ва ВАО-и панҷ кишвари Осиёи Марказӣ ба итмом расид. Умедворем, ки ин чорабинӣ дар ҳақиқат, ба пули дӯстии халқҳо мубаддал мегардад.

Медиапортал «TIROZ.ORG»

Нет комментариев

Также рекомендуем

Встреча Маликшо Негматова с Президентом Германии

Президент Германии Франк-Вальтер Штайнмайер во дворце Белвю принял глав дипломатических миссий, аккредитованных в стране. На официальном приеме принял участие Посол Республики Таджикистан в Германии Маликшо ...