Вохӯрии Раҳимзода Рамазон Ҳамро бо сарбозон

0
411 просмотров

20-уми феврали 2018, Вазири корҳои дохилӣ генерал-полковники милитсия Раҳимзода Рамазон Ҳамро зимни сафар ба шаҳри Турсунзода бо афсарону сарбозони қисми ҳарбии 07150-и Вазорати мудофиаи Ҷумҳурии Тоҷикистон ва қисми ҳарбии 6592-и Раёсати Қӯшунҳои дохилии Вазорати корҳои дохилӣ вохӯрӣ намуд. Вазири корҳои дохилӣ нахуст аз синфхона, хобгоҳ, ошхона ва гӯшаи ҳунарҳои мардумии қисми ҳарбии 07150, ки бахшида ба «Соли рушди сайёҳӣ ва ҳунарҳои мардумӣ» таъсис дода шудааст, дидан намуд. Зимни вохӯрӣ бо афсарону сарбозони қисми низомии 6592, аз иншооти ҷадид боздид ба амал оварда, бо шароити хизмативу маишии афсарону сарбозон аз наздик шинос гардид. Роҳбари аввали ВКД зимни вохӯрӣ бо афсарону сарбозони ниҳодҳои мазкур, аз номи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон афсарону сарбозонро ба муносибати 25-умин солгарди таъсисёбии Артиши миллӣ табрику муборакбод намуда, зикр кард, ки таҳти сиёсати хирадмандонаи Сарвари давлат имрӯз Қувваҳои Мусаллаҳи Ҷумҳурии Тоҷикистон ба яке аз сохторҳои пуриқтидори давлат табдил ёфта, афсарону сарбозони он аз иҷрои ҳама гуна вазифаҳои дар наздашон гузошташуда бо сарбаландӣ мебароянд.

Манбаи акс сомонаи расмии www.mvd.tj

Вазири корҳои дохилӣ аз марҳилаҳои ташаккули Артиши миллӣ ёдовар шуда, қайд кард, ки Қувваҳои Мусаллаҳи Ҷумҳурии Тоҷикистон давраҳои вазнину мураккабро тай намуда, таҳти роҳбарии Пешвои миллат муҳтарам Эмомалӣ Раҳмон ба яке аз сохторҳои боэътимоди давлату миллат табдил ёфтаанд. Рамазон Раҳимзода баъзе нуктаҳо ва муҳтавои Паёми навбатии Президенти Ҷумҳурии Тоҷикистонро шарҳ дода, зикр кард, ки яке аз самтҳои муҳиму афзалиятнок — ин Қувваҳои Мусаллаҳ ба шумор мераванд. Тавре, Сарвари давлат дар Паём баён доштанд: «Мо ба фарзандони ҷасуру далери халқамон, ҳомиёни Ватани маҳбубамон эътимоди комил дорем ва бо онҳо фахр мекунем». Моро мебояд ба боварии Роҳбари давлат ва халқ бо рафтору гуфтори нек, дониши баланд, шуҷоату далерӣ ва мардонагиву ҷасурӣ сазовор бошем. Қобили қайд аст, ки имрӯз дар сафи Қувваҳои Мусаллаҳ, ҷавонони баору номуси миллат хизмати Ватан-модарро ба ҷо оварда, баҳри оромиву осоиштагии марзу бум, таъмини волоияти қонун ва ҳифзи ҳуқуқу озодиҳои шаҳрвандон ҳамеша омодаанд. Дар баробари ин, ҳар яки моро зарур аст, ки баҳри амнияти мардум ва ҳифзи тартиботи ҷамъиятиву ҳуқуқии шаҳрвандон ҳамеша бо шуҷоату корнамоӣ ва малакаи баланди касбӣ дар сафи пеш қарор дошта, ба давлату миллат содиқона хизмат намоем. Дар охир ба муносибати Рӯзи Артиши миллӣ бо Фармони Вазорати корҳои дохилӣ як қатор афсарону сарбозони қисмҳои ҳарбии 07150 ва 6592 бо туҳфаҳои хотиравӣ қадрдонӣ гардиданд.

 

 

Манбаъ:сомонаи расмии www.mvd.tj

 

Нет комментариев

Также рекомендуем