Ба буҷети давлатӣ соли сипаригардида аз ҳисоби даромадҳои дохилӣ 11 миллиард сомонӣ ва аз ҳисоби пардохтҳои гумрукӣ 5,5 миллиард сомонӣ ворид гардидааст. Ин дар ҳолест, ки ҳаҷми маҷмӯи маҳсулоти дохилии Ҷумҳурии Тоҷикистон соли гузашта 77,3 миллиард сомонӣ ва суръати афзоиши он ба 7,5 фоиз баробар гардид.
Вазири молияи Ҷумҳурии Тоҷикистон Файзиддин Қаҳҳорзода 13 феврал зимни натиҷагирӣ аз фаъолияти Вазорати молияи мамлакат дар соли сипаригардида ба расонаҳои хабарӣ гуфт, ки рушди иқтисодии мамлакат дар ин давра асосан аз ҳисоби 13,6 фоиз зиёд гардидани ҳаҷми истеҳсоли маҳсулоти саноатӣ, 7,1 фоизи соҳаи кишоварзӣ ва 9 фоиз гардиши савдо ва хизматрасонии пулакӣ- дар ҳамаи соҳаҳои хизматрасонӣ 2,9 фоиз таъмин шудааст.
Инчунин ҳаҷми гардиши савдои хориҷӣ ба зиёда аз 4,5 миллиард доллари амрикоӣ баробар гардид, ки дар қиёс нисбат ба ҳамин давраи соли гузашта беш аз 299 миллион доллар ё ба андозаи 7,1 фоиз зиёд мебошад. Ҳамзамон соли гузашта Тоҷикистон ба хориҷа зиёда аз 1,1 миллиард доллари амрикоӣ молу маҳсулот содирот намуд, ки ҳиссаи он дар гардиши савдои хориҷӣ 26 фоизро ташкил медиҳад. Ба Тоҷикистон аз давлатҳои хориҷӣ ба маблағи зиёда аз 3,3 миллиард доллари амрикоӣ молу маҳсулот ворид карда шуд, ки дар қиёс ба соли 2018 198,3 миллион доллари амрикоӣ ё 6,3 фоиз зиёд буда, ҳиссаи воридот дар гардиши савдои хориҷӣ 74 фоизро ташкил додааст.
Вазири молия зикр кард, ки вобаста ба рушди иқтисодии ҷумҳурӣ ҳаҷми умумии даромади буҷети давлатӣ бо дарназардошти маблағҳои барои татбиқи лоиҳаҳои давлатии сармоягузорӣ ҷалбшуда ва маблағҳои махсуси муассисаю ташкилотҳои буҷетӣ ба 23,2 миллиард сомонӣ баробар гардида, иҷрои нақшаи нишондиҳандаҳои мазкур 99,7 фоиз таъмин шуд.
Гуфта шуд, ки дар сохтори ҳаҷми умумии даромади буҷети давлатӣ пардохтҳои андозӣ ва ғайриандозӣ 17,8 миллиард сомонӣ, маблағҳои махсуси ташкилоту муассисаҳои буҷетӣ 2,1 миллиард сомонӣ ва маблағҳои азхудшудаи лоиҳаҳои давлатии сармоягузорӣ 3,1 миллиард сомониро ташкил медиҳад.
Манбаъ: АМИТ «Ховар»
Нет комментариев