Санаи 22 июли соли 2015 бо мусоидати Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд сафарбаркунии 7 нафар муҳоҷирони меҳнатӣ ба шаҳри Шахти вилояти Ростови Федератсияи Русия ба роҳ монда шуд.
Онҳо аз ҷониби ширкати “ХимПек” бо ҷои кор таъмин карда мешаванд. Бино ба гуфти роҳбалад Елена Михайлова айни замон намояндагони ин ширкат дар вилояти Суғд қарор доранд. Муҳоҷирони меҳнатӣ пас аз суҳбат бо онҳо барои фаъолият дар ширкати “ХимПек” розигӣ додаанд.
Ширкати кордиҳанда ба муҳоҷирон муҳоҷирати меҳнатии бехатар ва қонунӣ, шароит ва маоши хубро кафолат додааст. Фаъолияти меҳнатии онҳо дар асоси шартнома ба роҳ монда мешавад.
Инчунин аз ҷониби ҶДММ “Сомонэкспрестранс” сафарбаркунии навбатии муҳоҷирони меҳнатӣ аз вилояти Суғд ба Федератсияи Русия ба роҳ монда шуд.
Аз ҷониби ширкати мазкур 20 нафар шаҳрвандон ба шаҳри Нефтеюганск сафарбар гардиданд. Бино ба гуфти сардори гурӯҳ Абдуқодиров Мансурҷон муҳоҷирони меҳнатӣ дар ин шаҳр асосан ба корҳои сохтмонӣ машғул хоҳанд шуд.
Дар маросими гусел намояндагони Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд дар байни сафарбаршудагон маводҳои ташвиқотӣ тақсим намуданд.
Дар ин бора sugd.tj хабар медиҳад.
Нет комментариев