«Зулайхо»-и Ҷ. Муродовро дар Киев хуш пазируфтанд

0
831 просмотров

Дар арафаи 75-солагии рӯзи мавлуд Ҳунарманди халқии Иттиҳоди Шӯравӣ Ҷӯрабек Муродов дар назди мухлисону ҳаводорони сершумораш, ки дар толори консертии шаҳри Киеви Ҷумҳурии Украина ҷамъ омада буданд, бо суруди машҳури «Зулайхо» баромад намуд.

Баромади устод Ҷ.Муродов дар интиҳои барномаи консертии фарзандаш — Ҷонибек, ки касбу ҳунари падарашро пеша намудааст, сурат гирифт.

                                            Асрори шӯҳратманд шудани Ҷӯрабек Муродов

Давоми фаъолияти эҷодии 55-солааш зиёда аз 2000 суруд сароидааст, ки оҳангҳои 450-тоаш маҳсули эҷоди устод Ҷӯрабек Муродов мебошад. Ҷӯрабек Муродов солҳои 70-80-уми асри гузашта як силсила мақолаҳои илмӣ низ таълиф намудааст, ки дар роҳи омӯзиши мусиқии суннатӣ бебаҳоянд. Бахусус, мақолаҳои «Умри ҷовидонаи санъаткор», «Ба рағми булбулон», «Ҳофизи мумтози халқ», «Ҳунарвари бузург» метавон зикр намуд, ки барои бедор намудани завқи мусиқишиносии хонанда арзиши баландро соҳибанд. Ҷӯрабек Муродов сарояндаи ҷӯянда ва нисбат ба касби худ серталаб аст. Ӯ пайваста санъати мусиқии гузаштаю имрӯзаи миллатамонро бо ҳисси шавқмандӣ меомӯзад. Бахусус, намунаи овозҳои ҳофизони халқӣ ва ҳирфаии тоҷик Ҳоҷӣ Абдулазиз, Содирхон Ҳофиз, Домулло Ҳалим, устод Шодӣ, Акашариф Ҷӯраев, Бобоқул Файзуллоевро ҷамъ намуда, унсурҳои бо худ хоси вокализми халқӣ-профессионалии тоҷикро ба комёбиҳои навинаш пайваста меомӯзад. Ин аст яке аз чашмгиртарин асрори шӯҳратёри ӯ дар ҷодаи санъат.

Ҷӯрабек Муродов ба маънои томаш эҷодкори ҳақиқии санъат мебошад. Зеро ин абармарди дунёи санъат дар иҷрои ҳар як суруди нав тарафҳои тоза ба тозаи истеъдоди худро ба мухлисон зоҳир мекунад. Пешравии ӯро ҳатто аз суруд то суруд ва аз оҳанг то оҳанг метавон мушоҳида намуд. Дуди чароғ хӯрдану дандон болои ҷигар гузоштан ва зулмотро ба субҳ бадал намудан гувоҳи 55 соли санъаткории ӯст. Маҳз ҳамин сӯхтанҳову сохтанҳои устод дар роҳи эҳёи санъати мусиқӣ ва овозхонии аҷдодонамон боис гардид, ки номи муборакаш вирди забонҳову сабти китобу қомусҳои зиёде гардад.

                                                          Китоб дар бораи Ҷӯрабек Муродов

Соли 1998 ҷилди якуми китоби бисёрҷилдаи тарҷумаиҳолӣ дар Москва таҳти унвони «Дар тамаддуни имрӯза, кӣ кӣ аст?» аз чоп баромад. Китоби мавриди назар фарогири 3 боб буда, қисматҳои «Инсони асри ХХ», «200 нафар арбоби барҷастаи имрӯз» ва «Хазинаи тиллоӣ»-ро дар бар мегирад. Боиси ифтихори бузург ва сарбаландии мо тоҷикон аст, ки дар байни 200 нафар шахсиятҳои барҷастаи ҷаҳон, аз қабили санъаткорони бузург Людмила Зикина, Иосиф Кобзон, Алла Пугачёва, Филипп Киркоров, Валерий Леонтев, Лариса Долина ҳунарманди маҳбуби мо, устод Ҷӯрабек Мурод низ ҷой гирифтааст.

                                                                             Ҳофизи миллат

Филми ҳуҷҷатии «Ҳофизи миллат», ки аз 14 қисм иборат аст, ба муносибати 75-солагии зодрӯз ва 55-солагии фаъолияти эҷодии устод Ҷӯрабек Муродов таҳия ва манзури тамошобинон гардонида шуд. Ҳар як қисми филм дар алоҳидагӣ ҳамчунин дар шабакаҳои иҷтимоӣ низ гузошта шудаанд.

Дар филм – хотироти худи устод Ҷӯрабек Муродов, пайвандон ва дӯстони ӯ ҷамъ оварда шудаанд. Ҳофиз дар филм нақл менамояд, ки дар аввали солҳои 90-ум кӯшиши ба ҳаёти вай халал ворид намуданро карданд. «Он замон тавассути телевизионҳои давлатӣ маро душмани халқ эълон намуданд. Ман ва оилаамро хостанд, несту нобуд кунанд. Маҷбур шудам, ки кишварро тарк намоям. Вақте ки ба Самарқанд омадем, ман гиристам, наход чанд сол ба мардум хизмат карда, ҳоло бозичаи дасти баъзе аз нафарон шуда бошам», — нақл менамояд Ҷӯрабек Муродов дар филм.

Ҳофиз ҳамчунин нақл мекунад, ки дар охири асри гузашта чӣ тавр вакили мардумӣ шуд. «Ин солҳо осон набуданд. Маро аз байни 18 номзад интихоб намуданд. Суханҳои бисёр гуфтанд, сароянда набояд бо сиёсат машғул шавад. Аммо санъат – ин сиёсат ва сиёсат – ин санъат аст. Сиёсатмадоре, ки навовариҳои риторикӣ надорад, метавонад ба нокомӣ дучор шавад. Чаро коргари корхона ва кишоварз вакили мардумӣ шуда метавонад, вале корманди санъат — не? Чаро шоир вакили мардумӣ мешавад, аммо сароянда не? Ман аз байни мардум баромадам ва хостам ба мардум хизмат намоям. Вақте ки дар ҷаласаҳо орзую умеди халқро пешниҳод мекардам, маро душмани миллат эълон карданд », — мегӯяд сароянда.

                                                             Чанд сухан аз зиндагинома

Ҷӯрабек Муродов 24-уми декабри соли 1942 дар деҳаи Куруди ноҳияи Айнӣ ба дунё омадааст. Соли 1963 баъд аз хатми Донишкадаи давлатии омӯзгории Ленинобод – имрӯза Донишгоҳи давлатии Хуҷанд ба номи академик Б.Ғафуров ба ҳайси ассистенти кафедраи педагогика ва методикаи синфҳои ибтидоӣ дар хамин донишкада ба фаъолияти хеш оғоз намудааст.

Сипас то ба соли 1992 дар Филармонияи давлатии Тоҷикистон ба ҳайси сароянда, роҳбари дастаи бадеӣ ва роҳбари бадеӣ фаъолияти эҷодиашро ба роҳ мемонад.

Аз соли 1992 сарояндаи Театри давлатии мусиқию мазҳакавии ба номи Камоли Хуҷандӣ, сипас роҳбари бадеии ансамбли Шашмақоми назди Кумитаи давлатии телевизион ва радиои Тоҷикистон, профессори Академияи мусиқии Ҷумҳурии Тоҷикистон ва Факултети санъати ДДХ ба номи академик Б. Ғафуров (аз соли 1994) мебошад.

Аз соли 2006 ба ҳайси сарояндаи Театри давлатии мусиқию мазҳакавии ба номи Камоли Хуҷандӣ ва роҳбари Ансамбли давлатии шашмақомсароёни «Нури Хуҷанд» кор карда истодааст. Сароянда, мутриб ва оҳангсози нотакрору беназири тоҷик (дорои тенори лирикӣ) устод Ҷӯрабек Муродов соли 1967 бо унвони Ҳунарпешаи шоистаи Ҷумҳурии Тоҷикистон, соли 1974 бо унвони Ҳунарпешаи халқии Ҷумҳурии Тоҷикистон ва соли 1979 бо унвони олии Ҳунарпешаи халқии СССР сарфароз гардонида шудааст.

Дар фарҷом аз номи кулли мухлисону ҳаводорон устод Ҷӯрабек Муродовро ба муносибати 75-солагии зодрӯз ва 55-солагии фаъолияти эҷодиашон самимона табрик намуда, барояшон дарозумриву сарбаландӣ ва сиҳатмандиву саодатмандии ҳамешагиро таманно менамоем!

 

                                                                                                                     Медиапортали «Тироз»

 

 

 

Нет комментариев

Также рекомендуем