14 варзишгар дар Бозиҳои олимпии Париж, Тоҷикистонро муаррифӣ менамоянд

0
116 просмотров

Муҳимтарин чорабинии варзишии имсола — Бозиҳои XXXIII тобистонаи олимпӣ мебошад, ки он аз 26 июл то 11 августи соли 2024 дар шаҳри Парижи Фаронса баргузор мегардад. Имсол 14 варзишгари мамлакат роҳхатҳои Бозиҳои олимпии Парижро соҳиб шуданд ва дар он Ҷумҳурии Тоҷикистонро муаррифӣ мекунанд. Дар ин хусус Ноиби президенти Кумитаи миллии олимпии Тоҷикистон Дилшод Назаров ба шореҳи варзиши АМИТ «Ховар» хабар дод.

Иттилоъ дода шуд, ки ҷудочиёни тоҷик маротибаи аввал соҳиби 6 роҳхати олимпӣ шуданд. Онҳо Эмомалии Нуралӣ дар вазни то 66 кг, Беҳрӯз Хоҷазода дар вазни то 73 кг, Сомон Маҳмадбеков дар вазни то 81 кг, Комроншоҳ Устопириён дар вазни то 90 кг, Темур Раҳимов дар вазни +100 кг ва тариқи квота Ҷаҳонгир Маҷидов дар вазни то 100 кг мебошанд.

Ёдовар мешавем, ки қаблан варзишгарони тоҷик ба Олимпиадаи Париж панҷ роҳхат гирифта буданд, ки сетоаш ба риштаи бокс, яктоӣ ба таэквондо ва гӯштини озод марбут аст. Давлат Болтаев, Миҷгона Самадова ва Баҳодур Усмонов дар риштаи бокс, Мунира Абдусаломова дар риштаи таеквондо, Виктор Рассадин дар риштаи гӯштини озод роҳхатҳои олимпӣ ба даст овардаанд.

Иброз гардид, ки ба Тоҷикистон аз ҷониби Кумитаи байналмилалии олимпӣ дар риштаи шиноварӣ 2 квота (1 мард ва 1 зан) ва дар намуди варзиши сабук 1 квота ҷудо карда мешавад.

Бояд тазаккур дод, ки нахустин медали олимпиро ба Ҷумҳурии Тоҷикистон Расул Боқиев овардааст. Вай дар ҳайати дастаи мунтахаби Тоҷикистон соли 2008 дар Олимпиадаи Пекин дар намуди гӯштини ҷудо дар вазни то 73 кг барандаи медали биринҷӣ гардидааст.

Дар ин олимпиада намояндаи дигари Тоҷикистон Юсуф Абдусаломов дар гӯштини озод дар вазни то 84 кг медали нуқра гирифтааст. Мавзуна Чориева дар бокси занона дар вазни то 60 кг соли 2012 дар Лондон бо медали биринҷӣ сарфароз шудааст. Соли 2016 гурзандози тоҷик Дилшод Назаров дар Бозиҳои тобистонаи олимпӣ дар шаҳри Рио-де Жанейрои Бразилия медали тилло ба даст овард ва Тоҷикистонро дар байни 206 давлати ҷаҳон ба зинаи 54-ум баровард.

Манбаъ: АМИТ «Ховар»

Нет комментариев

Также рекомендуем

Сообщить об опечатке

Текст, который будет отправлен нашим редакторам: