Додгоҳи Перм як овозхони тоҷикро, ки мақомот ва расонаҳои Русия ӯро «ситораи попи Тоҷикистон» мегӯянд, ба ҷурми қочоқи маводи мухаддир ба 16 соли зиндон маҳкум кардааст.
Аммо аксе, ки дар робита ба хабари зиндонӣ шудани ин овозхони тоҷик дар сомонаи расмии додситонии Перм истифода шудааст, тасвириҚаҳрамони Шарифзод — сарояндаи попи Тоҷикистон аст. Ин акс бори аввал дар моҳи сентябри соли 2014, ҳангоми боздошти Қаҳрамони Шарифзод дар Перми Русия, ба гумони қочоқи маводи мухаддир нашр шуда буд.
Дар хабари додситонии Перм низ омадааст, ки овозхони тоҷик дар моҳи сентябри соли 2014 ба манзури сабти видеоии сурудаш ба ин шаҳр рафта ва ҳангоми фурӯши беш аз 100 грамм ҳероин аз ҷониби кормандони ҳифзи ҳуқуқи Русия боздошт шудааст.
«Дар муддати 3 моҳи иқомат дар шаҳри Перм ӯ роҳу усулҳои устувори фурӯши маводи мухаддирро роҳандозӣ кардааст. Сипас, ин сарояндаи қочоқбар зери назари кормандони ҳифзи ҳуқуқ афтода ва дар ҷараёни як амалиёт аз ӯ ним кило маводи мухаддир кашф ва мусодира шудааст,» – гуфта шудааст дар сомонаи расмии додситонии Перм.
Қаблан Вазорати корҳои дохилии Тоҷикистон низ боздошти Қаҳрамони Шарифзод, як сокини кишвар дар Русияро, ки ба унвони овозхон муаррифӣ мешавад, тасдиқ карда, аммо гуфта буд, ки “ӯ ба санъати тоҷик ягон муносибат надорад”. Вазорати корҳои дохилӣ аз Қаҳрамони Шарифзод зода ва истиқоматкунандаи ноҳияи Ҷалолиддини Румии вилояти Хатлон ном бурда афзуд, “ӯ дар қайдҳои махсуси ВКД ҳамчун истеъмолкунанда ва фурӯшандаи маводи махаддир мегузарад”.
Наздикон ва ҳамкорони Қаҳрамони Шарифзод мегӯянд, ӯ танҳо ният доштааст, ки дар Русия кор карда, клипи навашро омода кунад. Нигора Шарифова, хоҳари бузурги Қаҳрамони Шарифзод, ба Озодӣ гуфт, бародараш ба манзури омода кардани клип ба Русия рафта буд ва ин хабарҳо, ки дар борааш нашр мешаванд, сиҳат надоранд.
Қаҳрамони Шарифзод аз ҷумлаи ҷавонони бешуморест, ки солҳои ахир пой ба саҳнаи мусиқии попи тоҷик гузоштаанд ва то ба имрӯз ҳудуди панҷ клип, ба шумули «Оре», «Баҳори гулфишон» ва «Ҳеле ёрум» – ро метавон дар шабакаҳои интернет тамошо кард. Ин клипҳо бо сифати баланд дар формати HD сабт шудаанд.
Қаҳрамони Шарифзод зодаи ноҳияи Ҷалолиддини Румӣ буда, 38 сол дорад. Ба саҳна чор сол пеш омада, то замни боздошташ дар ҷустуҷӯи ҷойгоҳ буд. Ҳамсӯҳбатони мо мегӯянд, ягон вижагии фавқулодда дар санъат надошт, аммо сахт мекӯшид ва дар роҳи расидан ба ҳадаф мустаҳкам буд.
Манбаъ: http://www.ozodi.tj/
Нет комментариев