Сокинони шаҳр шикоят доранд, ки рӯзи севум аст, ки дар маркази маъмурии вилояти Суғд – шаҳри Хуҷанд ҳаракати автобусҳо қатъ шудааст. Сабабҳои дақиқ ҳанӯз рӯшан нест.
Абдуҷалил Бобоҷонов, муовини Корхонаи воҳиди давлатии «Нақлиёти ҷамъиятии шаҳри Хуҷанд» тариқи телефон ба хабарнигори АИ «СН» изҳор дошт, ки «ӯ салоҳият надорад, ки маълумотро ба расонаҳо расонад».
— Аз мудири мо пурсед, — гуфт ӯ.
Музаффар Раҳимхоҷаев, раиси КВД «Нақлиёти ҷамъиятии шаҳри Хуҷанд» дар як сӯҳбати телефонӣ бо баҳонаи «баъдтар занг мезанад» телефонро хомӯш кард.
Ба гуфтаи иддае аз коршиносон, мумкин аст, дар Хуҷанд автобусҳо ба далели мушкилӣ аз сӯзишвории дизелӣ, ки Корхонаи воҳиди давлатии “Нақлиёти ҷамъиятии шаҳри Хуҷанд” бо қарз аз ширкатҳои таъминкунанда дарёфт мекунад, сар зада бошад.
«Сабаби дигари аз кор мондани автобусҳо дар шаҳр пардохтҳои ғайринақдӣ барои роҳкиро мебошад. Бисёри шаҳрвандон корт надоранд, вале автобусҳо пули нақд намегиранд. Агар кондукторҳо барои сафар пули нақд бигиранд, ҷарима хоҳанд шуд”, — қайд мекунад ҳамсӯҳбатон.
Ёдовар мешавем, ки кори тамоми автобусҳои Корхонаи воҳиди давлатии «Нақлиёти мусофиркашони шаҳри Хуҷанд» аз 1 сентябри соли 2021 аз оғоз намуда, барои кори муътадили нақлиёти ҷамъиятӣ пардохт дар автобусҳо танҳо бо интиқоли бонк сурат гирифт.
Аз соли гузашта, дақиқтараш бо фарорасии пандемияи коронавирус шумораи ками мусофирон аз автобус истифода кардаанд. Ин вазъият боиси талафот гардид. Муассисаи нақлиёти мусофирбарии шаҳри Хуҷанд ба бӯҳрон дучор шудааст. Вақтхои охир дар байни шаҳри Хучанд, ноҳияи Б.Ғафуров ва шаҳри Бӯстон ҳамагӣ 30 фоизи автобусхо ҳаракат мекарданд.
Ёдовар мешавем, ки аз моҳи августи соли 2018 дар маркази маъмурии вилояти Суғд – шаҳри Хуҷанд 100 автобуси нави истеҳсоли Русия ба ҳаракат даромад. Ҳамаи ин автобусҳо тибқи лоиҳаи «Рушди нақлиёти ҷамъиятӣ дар шаҳри Хуҷанд» бо дастгирии ҳукумати Тоҷикистон ва маблағгузории Бонки Аврупоии Таҷдид ва Рушд харидорӣ шудаанд.
Аз рӯйи маводи «Sugdnews.com»
Нет комментариев