13 январ дар Кохи матбуоти шаҳри Хуҷанд нишасти хабарии Раиси вилояти Суғд оид ба натиҷаҳои вазъи  иҷтимоию иқтисодии вилоят дар моҳҳои январ-декбари соли 2014 баргузор гардид, ки дар он 60 нафар намояндагони васоити ахбори омма иштирок намуданд. Нишасти матбуотӣ бо сухани ифтитоҳии мудири Шӯъбаи иттилоот ва таҳлили дастгоҳи Раиси вилоят Музаффар Юнусов оғоз ёфт ва сипас Раиси вилоят Абдураҳмон Қодирӣ оид ба натиҷаҳои вазъи иҷтимоию иқтисодии вилоят дар давраи ҳисоботӣ маълумот дод. Зикр гардид, ки мардуми вилоят чун тамоми сокинони мамлакатамон соли 2014 — ро, ки соли таҷлили ҷашни бузурги миллӣ – 20-солагии Конститутсияи (Сарқонуни) Ҷумҳурии Тоҷикистон ва соли пурбаракат, хотирмон ва дастовардҳои шоиста буд, бо сарбаландӣ ҷамъбаст намуданд. Абдураҳмон Қодирӣ ҳамзамон аз амалишавии иқдомоти роҳабарияти вилоят дар соли сипаришуда, аз ҷумла ислоҳоти кишоварзӣ, эҳёи ҳунарҳои мардумӣ ва ободонии роҳҳо ёдовар шуда, изҳор дошт, ки дар асоси Қарори Раиси вилоят аз 9 декабри соли 2013 аз 2991 адад хоҷагиҳои калонҳаҷм 2968 адад мавриди азнавташкилдиҳӣ қарор дода шуда, дар заминаи онҳо 37090 адад хоҷагиҳои деҳқонии нав таъсис дода шуд. Аз миқдори умумии хоҷагиҳои навташкил 30399 адад бо Сертификати ҳуқуқи истифодаи замин таъмин гардиданд. Зимнан, таъкид шуд, ки ба ҳолати 1 январи соли 2015 дар ҳамаи шаклҳои хоҷагидории вилоят ба маблағи 5687,3 млн. сомонӣ маҳсулот истеҳсол гардид, ки дар муқоиса нисбат ба соли 2013 — 103,4 фоизро ташкил медиҳад. Раиси вилоят зимни сӯҳбат изҳор дошт, ки барои эҳёи ҳунарҳои мардумӣ дар соли 2015 низ таваҷҷӯҳи махсус зоҳир карда шуда, теъдоди марказҳои омӯзишӣ аз 40 адади мавҷуда то ба 115 адад расонида мешавад. Сипас Раиси вилоят ба суолҳои журналистон доир ба ободонии роҳҳо, рушди ҳамкориҳои вилоят бо минтақҳои ҳаммарзи кишварҳои ҳамсоя, вазъи соҳаи кишоварзӣ, пурра ба кор андохтани иқтидорҳои истеҳсолӣ, таъмини сокинон бо қитъаҳои замини наздиҳавлигӣ ва ғайра посух гуфта, аз журналистон даъват ба амал овард, ки бо инъикоси масоили мавҷуда барои ҳалли онҳо кӯмак намоянд. Дар ин бора хабарнигори радио «Тироз» Мутрибахон  Алихонзода хабар медиҳад.