Хонандаи Литсейи физикӣ-математикии №1 ба номи академик Муҳаммад Осимии шаҳри Хуҷанд Мафтуна Муродуллоева дар Олимпиадаи байналхалқии арифметикаи зеҳнӣ, ки дар шаҳри Шарм-уш-Шайхи Ҷумҳурии Мисри Араб доир шуд, соҳиби Шоҳҷоиза шуд.
Олимпиада санаи 7-уми март бо иштироки 300 нафар наврасони донандаи арифметикаи аз 5 то 14-сола аз 9 кишвари дунё доир гардид. Тоҷикистонро дар олимпиада ҳашт нафар наврас аз шаҳри Хуҷанд муаррифӣ карда, як нафар бо Шоҳҷоиза ва дигарон бо мақомҳои гуногун ба Ватан баргаштанд.
Ҳамин тавр, ду хонандаи дигари синфи 8-уми Литсеи физикӣ — математикии №1-и шаҳри Хуҷанд Сабрина Зиёбоева ва Ҷаҳонгир Усмонов дар ин олимпиада иштирок намуда, Сабрина мақоми аввал ва Ҷаҳонгир ҷойи 3-юмро ба даст оварданд.
Ҳамчунин Сумайя Ёдгорова аз мактаби хусусии Пулотов мақоми аввал, Азизҷон Саидов, хонандаи синфи 6-уми мактаби хусусии «Файз» ҷойи сеюм, Наҷминисо Бобоҷонова, Комрон Бобоҷонов ва Диловар Абдуллоев аз литсеи политехникии шаҳри Хуҷанд мақомҳои дуюм ва сеюмро соҳиб шуданд.
Номбурдагон дар Маркази инкишофи зеҳнии «Пифагорка» дар шаҳри Хуҷанд буда, машғулиятҳои иловагӣ гирифта, ба олимпиада омодагӣ диданд.
Тавре ба мо директори Литсейи физикӣ-математикии №1-уми ба номи Муҳаммад Осимии шаҳри Хуҷанд Моҳира Азимова иттилоъ дод, дар соли таҳсили 2017 — 2018-ум 43 нафар хонандагони литсей дар Олимпиадаи шаҳрӣ ҷойҳои намоёнро ишғол намуданд. 25 нафари дигари хонандагони синфҳои 5-11-уми ин муассисаи бонуфуз дар Олимпиадаи вилоятӣ мақомҳои намоёнро ба даст оварданд.
Ҳамзамон 2 нафар хонандагони литсей Беҳрӯз Мансуров аз фанни физика ва Муҳаммад Маҳмудов аз фанни математика дар Олимпиадаи байналмилалии Жаутиковскийи шаҳри Алма–Атои Қазоқистон иштирок намуда, соҳиби серификат гардиданд. Хонандаи синфи 11 Шаҳзод Раззоқов дар олимпиадаи байналмилалии фосилавӣ, ки дар кишвари Тайланд баргузор шуд, аз фанни химия иштирок намуда, соҳиби ҷойи 2-юм гардид.
Манбаъ: Дафтари матбуоти Раиси шаҳри Хуҷанд
Нет комментариев