Федератсияи велосипедронии Ҷумҳурии Тоҷикистон бо дастгирии Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва ширкати Tcell веломарафони зимистонаи оммавиро баргузор менамоянд, ки он ду шаҳри вилояти Суғд- Бӯстон ва Хуҷандро бо ҳам мепайвандад. Маросими ифтитоҳи чорабинӣ ва сабти номи иштирокчиён соати 08:00, рӯзи 17 феврал дар шаҳри Хуҷанд, назди ҳукумати вилоят сурат мегирад.
Дар веломарафони оммавии зимистона ҳама хоҳишмандон, дӯстдорони дучархасаворӣ- новобаста аз синну сол ва тайёрии варзишӣ иштирок карда метавонанд. Масири пайванд ва мусобиқаи мазкур ду шаҳри вилояти Суғд- Бӯстон ва Хуҷанд муайян шудааст. Расми пӯшидавашӣ ва маросими ҷоизасупорӣ ба ғолибони сабқат дар назди майдони Парчами шаҳри Бӯстон анҷом мепазирад. Ҳамчунин, баъди ба охир расидани мусобиқа барои ҳамаи иштирокчиён дастархони идона густурда мешавад.
Барандагони мақомҳои ифтихории мусобиқа бо ҷоизаҳои гаронарзиш- смартфон ва SIM-кортҳои Tcell (бо иловаи интернету иртибот) қадрдонӣ мегарданд. Илова бар ин, ҳамаи ширкатдорон бо Ифтихорнома ва Сипосномаҳои ФВҶТ, Tcell ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон мукофотонида мешаванд.
«Дар замони муосир варзиши дучархаронӣ аз аҳамияти бештар ва муҳимияти зиёд бархӯрдор аст. Дар бархе аз кишварҳо одамон аз истифодаи дигар намуди нақлиёт, ки ба муҳити зист зарар мерасонад, даст кашида, ба дучархасаворӣ рӯ меоранд. Дучарха (велосипед) – хароҷоти зиёди иқтисодӣ дар пай надорад, ба буҷаи оила зарар намерасонад ва барои варзишу саломатӣ қулай аст. Веломарафони оммавӣ дар Суғд таваҷҷуҳи мардуми зиёдро ба ин намуди варзиш ҷалб хоҳад кард. Ва албатта мо умед мекунем, ки миёни ширкатдорони мусобиқа “ситораҳои оянда” ва қаҳрамононро бубинем”, — мегӯяд Президенти Федератсияи велосипедронии Ҷумҳурии Тоҷикистон, Озодхон Давлатшоев.
Федератсияи велосипедронии Тоҷикистон фаъолияти муваффақ ва пурсамар дорад: дар назди он мактаби дучархасаворӣ амал менамояд, мунтазам мусобиқаҳои сатҳи мухталиф баргузор мешаванд, тарғибу ташвиқи сокинони кишвар ва ҷалби бештари ҷавонон ба ин навъи варзиш ҳамарӯза идома меёбад. Ба ин васила, тарзи ҳаёти солим ва рушди варзиш ташвиқ гардида, роҳ барои иштироки варзишгарони Тоҷикистон барои ширкат дар мусобиқоти сатҳи ҷаҳонӣ боз мегардад.
Веломарафони оммавии зимистона бо ҳадафи тарғибу ташвиқи тарзи ҳаёти солим ва оммавӣ гардонидани варзиш миёни ҷавонони Тоҷикистон доир мешавад. Чорабинии варзишии мазкур бо ибтикори Федератсияи велосипедронии Ҷумҳурии Тоҷикистон бо мусоидати Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва дастгирии ширкати Tcell, инчунин ширкати Coca-Cola-ву Somon Air баргузор мегардад.
Нет комментариев