Дар рӯзи охири мусобиқаи Baku Grand Slam 2025 дар шаҳри Бокуи Озарбойҷон паҳлавони ҷавони тоҷик Ҷаҳонгир Маҷидов дар вазни то 100 кг барандаи нишони биринҷӣ шуд.
Ҷаҳонгир Маҷидов (-100 кг) дар даври аввал Кристиан Тоти маҷорӣ ва дар даври дуюм Рустам Шораҳматови ӯзбекро шикаст дода ба даври нимниҳоӣ роҳ ёфт. Дар марҳилаи нимниҳоии мусобиқа Маҷидов аз Арай Дотаи ҷопонӣ шикаст хӯрда, барои нишони биринҷӣ муборизаро идома дод.
Дар мубориза барои нишони биринҷӣ Ҷаҳонгир муқобили ҷудокори бетараф Муҳаммадалӣ Матаев зафар ёфта, соҳиби нишони биринҷӣ шуд. Ин барои Маҷидов медали чаҳоруми биринҷӣ дар мусобиқаҳои «Тоскулоҳи бузург» буд.
Ёдовар мешавем, ки паҳлавони дигари мо Кароматулло Ҳакимов (-100 кг) имрӯз дар даври аввал аз Ислом Бозбоеви қазоқ мағлуб шуда, аз идомаи рақобатҳо бенасиб монд.
Ҳамин тавр, ҷудокорони тоҷик бо 2 медали биринҷӣ мусобиқаи Baku Grand Slam 2025-ро ба анҷом расониданд. Ҷудокори дигари тоҷик Абубакр Шеров (-73 кг) дар рӯзи дуюми мусобиқаи мазкур соҳиби нишони биринҷӣ шуда буд.
Манбаъ: Варзиш-Тв
Нет комментариев