Санаи понздаҳуми октябри соли равон дар маркази вилояти Суғд, шаҳри Хуҷанд Иди Меҳргон бо шукӯҳу шаҳомати хоса ҷашн гирифта шуд. Дар ин рӯз озмунҳои «Оши палав», «Кадбонуи моҳир», намоишу фурӯши маҳсулоти кишоварзии шаҳру навоҳии вилоят ташкил гардид. Хоҷазода Ориф Ашӯрӣ, муовини Раиси вилояти Суғд ва Маъруф Муҳаммадзода, раиси шаҳри Хуҷанд аз растаи намоишу фурӯши маҳсулоти кишоварзии шаҳру навоҳии вилоят боздид намуда, ба нархҳои анвои пешкашнамудаи деҳқонон мароқ зоҳир намуданд. Бонувони шаҳри Хуҷанд маҳсули кадбонугии хешро бахшида ба Иди Меҳргон ба меҳмонон муаррифӣ карданд, ки бо гуногунанвогии хеш ҳар як бинандаро ба худ ҷалб менамуд. Хоҷазода Ориф Ашӯрӣ, муовини Раиси вилоят Суғд ҳозиринро бо Иди Меҳргон таҳният гуфта, номаи табрикотии Раиси вилояти Суғд Абдураҳмон Қодириро ба самъи ҳозирин расонд, ки дар он аз ҷумла гуфта мешавад: «Ҷашни Меҳргон дар радифи Наврӯзу Сада аз куҳантарин идҳои машҳури халқи тоҷик аст. Пайдоиш, рушду такомул ва таҳаввули он ба шуғлу рӯзгори деҳқонон марбут мебошад. Ин ҷашн дар рӯзи 16-уми моҳи меҳр, ки он рӯзро низ рӯзи меҳр меноманд, баргузор мегардид. Чунонки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид кардаанд, “Меҳргон тибқи андеша ва эътиқоди ниёгони мо дар оғози фасли тирамоҳ таҷлил карда мешуд. Он дорои эътидои кайҳонӣ буда, дар ин айём рӯзу шаб баробар мешавад ва ба ин сабаб номи ин моҳро меҳр гузоштаанд”. Аз ин рӯ, рӯзи меҳр ба муносибати ғундоштани ҳосили боғу зироат ва шукргузорӣ аз неъматҳои Замин-Модар аз тарафи мардум ҷашн гирифта мешавад. Имрӯз кишоварзони вилояти Суғд ғамхориву пуштибонии Ҳукумати Ҷумҳурии Тоҷикистонро ҳамарӯза дарк намуда, бо мақсади таъмини иҷрои дастуру супоришҳои Пешвои миллат муҳтарам Эмомалӣ Раҳмон софдилона меҳнат намуда, ҳамасола афзоиши ҳаҷми истеҳсоли маҳсулотро таъмин карда истодаанд». Сипас раиси шаҳри Хуҷанд Маъруф Муҳаммадзода ҳамагонро бо Иди Меҳргон табрик гуфт. Барои иштироки фаъолона дар гузаронидани чорабиниҳои Иди Меҳргон ба ҷомеаи меҳнатии коллеҷи тиббии шаҳри Хуҷанд ва саҳм гузоштан ба таъмини амнияти озуқаворӣ, бо нархҳои дастрас пешниҳод намудани маҳсулоти кишоварзӣ ба Сарраёсати кишоварзии вилоят ва кишоварзони шаҳру навоҳии Ашт, Бобоҷон Ғафуров, Деваштич, Исфара, Конибодом, Мастчоҳ ва Спитамен Сипосномаҳои Мақомоти иҷроияи ҳокимияти давлатии шаҳри Хуҷанд тақдим карда шуд. Барномаи илмию-фарҳангии адибон Ҷӯра Юсуфӣ, Озарахш, Гулноз ва санъаткорони шаҳри Хуҷанд табъи ҳозиринро болида намуд.
Манбаъ: сомонаи расмии МИҲД-и вилояти Суғд
Нет комментариев