Дар ноҳияи Айнии вилояти Суғд сохтмони ду корхонаи бузурги саноатӣ идома дорад, ки баъди ба истифода додани онҳо 2100 нафар бо ҷойи кор таъмин хоҳанд шуд.
Заводи сохташавандаи металлургияи ранга 1500 ҷои кор ба вуҷуд меоварад. Корхонаи мазкур аз ҷониби Ҷамъияти саҳҳомии пӯшидаи «Талко Голд» бунёд шуда, дар он истеҳсоли тилло ва сурма ба роҳ монда мешавад.
Бино ба иттилоъи дафтари матбуотии раиси вилоят, дар ҳоли ҳозир дар ин ҷо барои насби хати истеҳсолӣ корҳо идома доранд, маъдан дар конҳо истихроҷ мешавад. Дар сохтмон ва шахтаҳо 600 кас кор мекунад.
Тибқи нақшаи пешакӣ, корхона бо иқтидори коркарди 5 ҳазор тонна маъдан дар як шабонарӯз соли 2022 ба кор медарояд.
Корхонаи дуюми калонро ҶДММ «ТВЕА Душанбе-Майнинг Индустрия» сохта истодааст. Иқтидори солонаи корхонаи нав истеҳсоли 1 тонна тилло хоҳад буд. Ба кор 600 кас ҷалб карда мешавад.
Қобили зикр аст, ки раиси вилояти Суғд Раҷаббой Аҳмадзода бо рафти корҳои сохтмонӣ дар корхонаҳои истихроҷи маъдан ошно шуд. Зимни суҳбат бо роҳбарият ӯ қайд кард, ки бунёди чунин иқтидорҳо ба тавсеаи иқтидори иқтисодии ҳам минтақа ва ҳам тамоми кишвар мусоидат мекунад.
Аз рӯйи маводи «Sugdnews.com»
Нет комментариев