Рӯзи 1 май дар Қароргоҳи Сарвари давлат дар шаҳри Хуҷанд ҷаласаи Шӯрои машваратии назди Раиси вилояти Суғд оид ба беҳтар намудани фазои сармоягузорӣ баргузор гардид.
Дар ҷаласа аъзои Шӯро, соҳибкорон ва шарикони рушд, намояндагони бизнес – ассотсиатсияҳо, ширкатҳои сайёҳӣ, бонкҳо ва ташкилотҳои қарздиҳӣ, консулгарии давлатҳои хориҷӣ, роҳбарони як қатор сохторҳои мақомоти давлатӣ ширкат варзиданд.
Раиси вилояти Суғд Раҷаббой Аҳмадзода ба кори Шӯрои навбатӣ ҳусни оғоз бахшида, доир ба ҷараёни иҷрои дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти рушди соҳибкорӣ, ҷалби сармояи хориҷӣ ва таъмини рушди соҳаҳои иқтисодиву иҷтимоӣ ва Барномаҳои давлатӣ ибрози андеша кард.
Раиси вилоят изҳор дошт, ки бо ташаббуси Президенти мамлакат солҳои 2019 -2021 «Солҳои рушди деҳот, сайёҳӣ ва ҳунарҳои мардумӣ» эълон гардидааст ва имрӯзҳо дар вилоят баҳри таъмини ин ҳадаф заминаҳои ҳуқуқӣ фароҳам оварда шуда, нақшаи чорабиниҳо тасдиқ ва як қатор корҳои мушаххас амалӣ гардидаанд. Ҳамзамон, Раҷаббой Аҳмадзода аз таҳкими раванди соҳибкорӣ, бахусус ривоҷи соҳибкории хурду миёна, татбиқи лоиҳаҳои инвеститсионӣ, таъсиси ҷойҳои корӣ, густариши ҳамкориҳои тиҷоратӣ кишварҳои гуногун ёдовар шуда, ба аъзои Шӯро ҷиҳати ҷоннок намудани фаъолият дастуру супоришҳои судманд дод.
— Бо пешниҳоди Пешвои муаззами миллат, муҳтарам Эмомалӣ Раҳмон бо мақсади дастгирии соҳибкорон дар кишвар “300 рӯзи ислоҳот оид ба дастгирии соҳибкорӣ ва беҳтар намудани фазои сармоягузорӣ” эълон гардидааст, ки дар ин самт бояд корҳо ҷоннок карда шаванд, — зикр дошт Раиси вилоят.
Дар ҷаласаи Шӯрои машваратии назди Раиси вилоят оид ба беҳтар намудани фазои сармоягузорӣ инчунин ҳисоботи котиботи Шӯро, сардори Раёсати сармоягузорӣ ва идораи амволи давлатии вилоят Шарифҷон Аҳмедов ва мудири шӯъбаи рушди сайёҳии Мақомоти иҷроияи ҳокимияти давлати вилоят Абдумаҷид Раҳимов оид ба татбиқи Барномаҳои давлатӣ шунида шуд.
Сипас,аъзои Шӯрои машваратӣ фикру андешаҳои худро баҳри беҳтар намудани фазои сармоягузорӣ баён намуда, рӯзномаи ҷаласаи минбаъдаро тасдиқ намуданд.
Манбаъ:Хадамоти матбуоти Раиси вилояти Суғд
Нет комментариев