24 марти соли равон дар доираи тантанаҳои наврӯзӣ дар ипподроми Ҷамъияти саҳҳомии ба номи Абдураҳим Ҷумъаеви ноҳияи Бобоҷон Ғафуров мусобиқаҳои миллии “Пойга” ва “Бузкашӣ” баргузор гардид.
Раиси вилояти Суғд Раҷаббой Аҳмадзода зимни иштирок ва суханронӣ дар мусобиқаҳо кулли сокинон ва дӯстдорони варзиши аспиро бахшида ба Иди Наврӯз табрик намуд. Қайд карда шуд, ки варзиши аспӣ аз қадим маълуму машҳур буда, гузаштагони мо дар рӯзҳои ид, аз ҷумла Иди Наврӯз мусобиқаҳои гуногун ташкил мекарданд ва хушбахтона ин анъана имрӯз низ идома ёфта истодааст.
Имрӯзҳо ин навъи варзиш дар вилоят хеле рушд карда, дар ин бахш варзишгарони бомаҳорат зиёданд. Сокинон низ ба парваришу нигоҳубини аспҳо таваҷҷуҳи хоса доранд ва имрӯзҳо дар вилоят наздик 8500 сар асп мавҷуд аст.
Сипас, мусобиқаи “Пойга” дар 8 давр ва масофаҳои 1600 то 2000 метр ҷараён гирифт. Ҳамин тавр ҷойи якумро аспи Алиев Усмонхон бо номи “Ректор”, ҷойи дуюмро аспи Олимбек Юлдошзода бо номи “Вазир” ва ҷойи сеюмро аспи Анварбек Саидмуродов бо номи “Устувор” соҳиб шуд. Ғолибон бо ҷоиза ва мукофотҳои пулӣ сарфароз гардонида шуданд.
Дар ин рӯз ҳамчунин мусобиқаи “Бузкашӣ” низ доир шуд ва дар он човандозон аз тамоми гӯшаву канори вилоят ширкат варзиданд.
Манбаъ: Хадамоти матбуоти Раиси вилояти Суғд
Нет комментариев