Имрӯз бо иштироки садҳо нафар занону духтарони фаъоли вилоят дар Қасри Арбоб бахшида ба Рӯзи Модар чорабинии тантанавии идона баргузор гардид.
Иҷрокунандаи вазифаи Раиси вилоят Раҷаббой Аҳмадзода зимни суханронии худ кулли занону бонувонро бахшида ба Рӯзи Модар табрик гуфта, зикр сохт, ки эҳтирому арҷгузорӣ ва шинохти қадру манзалати Модар вазифаи инсонии ҳар фарди худогоҳ буда, маҳз ҷозибаи ҷонбахши Модар, меҳру самимияти гарм ва ғамхории пайвастаи модарон ва хоҳарони мо зиндагиро нуру зиёи хоса мебахшад.
-Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шинохт ва эҳтироми зан-модар фармудаанд: “Модар гаҳвораву оламро ба ҳам мепайвандад, рисолати пурзаҳмати парвариши наслҳоро ба дӯш кашида, бо сиришту замири покаш барои ҳастии фарзанд, ободии хонадон ва осоиши ҷомеа талош менамояд”.
Дар ҳақиқат, Модар азизтарин вуҷуди рӯи замин ва нафаси гарму дилнавози ӯ ибтидои ҳастист. Зан – модар сарчашмаи ҷовидонаи сидқу вафо, рамзи зебоӣ ва накӯӣ, нахустин мураббӣ ва муаллими насли инсонӣ мебошад, зеро сиришти ин мавҷуди муқаддас иборат аз меҳри ростину садоқати фитрист-, таъкид намуд Раҷаббой Аҳмадзода.
Тавре зикр гардид, саъю талошҳои Ҳукумати Ҷумҳурии Тоҷикистон дар самти баланд бардоштани мақоми занон ва ҷалби бештари занону духтарон ба ҳаёти сиёсиву иҷтимоии ҷомеаи кишварамон маҳз ба хотири арҷгузорӣ ба нақши баланди онҳо мебошад.
Бо шарофати сиёсати оқилонаву ҳадафманди Пешвои миллат муҳтарам Эмомалӣ Раҳмон имрӯз занони мо соҳибмаълумот, соҳибмақом ва соҳибмаърифат гардида, дар тамоми соҳаҳо фаъолият мебаранд. Имрӯз аз наздик 1 миллиону 300 ҳазор нафар занону духтарони вилоят 6167 нафарашонро занони роҳбар ва 1271 нафарашонро хизматчиёни давлатӣ ташкил медиҳанд. Аз ҳисоби занони вилоят 1 нафар дар мансаби муовини Раиси Маҷлиси намояндагони Маҷлиси Олии Ҷумҳурии Тоҷикистон, 1 нафар ба ҳайси узви Маҷлиси миллии Маҷлиси Олии Ҷумҳурии Тоҷикистон, 4 нафар ба ҳайси вакилони Маҷлиси намояндагони Маҷлиси Олии Ҷумҳурии Тоҷикистон, 1 нафар дар мансаби Раиси Суди Олии иқтисодии Ҷумҳурии Тоҷикистон фаъолияти пурсамар доранд.
Ҳузури фаъоли занон дар мақомоти маҳаллии ҳокимияти давлатӣ ва худидоракунии маҳаллӣ низ мояи ифтихор аст ва фаъолияти 1 нафар ба ҳайси муовини Раиси вилоят, 2 нафар раиси шаҳр, 15 нафар муовинони раисони шаҳру ноҳияҳо, 18 нафар ҳамчун вакилони Маҷлиси халқи вилояти Суғд, 99 нафар ба ҳайси вакилони Маҷлисҳои вакилони халқи шаҳру ноҳияҳои вилоят ва 536 нафар ба ҳайси вакилони ҷамоат, аз ҷумла 10 нафар ба ҳайси раиси ҷамоат худ гувоҳи он аст, ки занон дар канори мардон барои пешравии ҷомеа саҳми арзанда доранд.
Иттилоъ дода шуд, ки имрӯзҳо дар соҳаи маориф 23 ҳазору 627 нафар, ва дар соҳаи тандурустӣ 24,6 ҳазор нафар занону духтарон барои таълиму тарбияи насли наврас ва солимии ҷомеа заҳмат мекашанд.
Бояд ёдовар шуд, ки дар Раёсати Вазорати корҳои дохилии Ҷумҳурии Тоҷикистон дар вилояти Суғд ва сохторҳои он дар шаҳру ноҳияҳои вилоят, Раёсати гумрук, Раёсати андоз, Комиссариати ҳарбӣ, соҳаҳои фарҳанг, саноату кишоварзӣ ва дигар бахшҳо низ бонувон ва заноне ҳастанд, ки баробари мардон бо меҳнати фидокорона, хизматҳои шабонарӯзӣ ва маҳорати баланди касбии хеш баҳри пешрафту шукуфоии Ватани маҳбубамон ва дар амал татбиқ намудани сиёсати хирадмандонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон саҳмгузор мебошанд.
Дар охири чорабинӣ барои болидахотирии иштирокдорон барномаи фарҳангии аҳли санъати вилоят пешниҳод карда шуд.
Манбаъ: Хадамоти матбуоти Раиси вилояти Суғд
Нет комментариев