7 августи соли ҷорӣ дар бинои Маркази назорати давлатии санитарию эпидемиологии шаҳри Истаравшан ташхисгоҳи нави вирусологӣ ба фаъолият оғоз намуд.
Ташхисгоҳ бо дастгирии мақомоти иҷроияи ҳокимияти давлатии шаҳр ва соҳибкорони маҳаллӣ мутобиқ ба меъёрҳои замони муосир аз таъмири пурра бароварда шуда, дорои 10 ҷои корӣ барои мутахассисони соҳа мебошад. Ташхисгоҳи мазкур бо мақсади муайян намудани бемории сироятии коронавируси «COVID-19» таъсис дода шуд ва ҷараёни ташхис 3 зинаро фаро гирифта, имкони дар як шабонарӯз гузаронидани 150-200 таҳлилро дорад.
Бо дастгирии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон аз тарафи ташкилоти умумиҷаҳонии тандурустӣ як адад таҷҳизоти ташхиси бемории сироятии «COVID-19», бокси бехатарӣ, яхдон, қуттии дорувориҳо ҷиҳати гузаронидани ташхис барои 5000 таҳлил ва дигар лавозимоту таҷҳизотҳои замонавӣ ва зарурӣ харидорӣ карда шуда, ташхисгоҳ имруз барои хизматрасонӣ ба аҳолӣ пурра омода аст.
Мутахассисони ташхисгоҳ аз курси махсуси омӯзишӣ дар Муассисаи давлатии «Пажӯҳишгоҳи тиббии профилактикии Ҷумҳурии Тоҷикистон» гузаштанд. Дар оянда низ кормандони дигар дар ин муассисаи тиббӣ марҳила ба марҳила тарзу усули гузаронидани таҳлилҳоро меомӯзанд.
Ҷоиз ба зикр аст, ки то имрӯз намунаи таҳлили гумонбарони бемории «COVID-19» барои ташхис ба шаҳри Душанбе фиристода мешуд.
Манбаъ: Хадамоти матбуоти Раиси вилояти Суғд
Нет комментариев