Вазорати маориф ва илми Тоҷикистон низоми таътилҳои тирамоҳиву баҳориро баргардонидааст.
Дар соли хониши нав таътили якмоҳаи зимистона барҳам хӯрда, ҷои онро се таътили якҳафтаӣ гирифт. Ин ҳамон низомест, ки дар давраи шӯравӣ амал мекард.
Осим Каримзода, сардори Раёсати маорифи вилояти Суғд гуфт, ки тибқи низомномаи нави ҳайати мушовараи вазорати маориф ва илм, дар мактабҳои таҳсилоти умумии ҳамагонии Тоҷикистон таътили якмоҳаи зимистона барҳам дода шуд ва ба ҷои он хонандагон баъди ҷамъбасти ҳар чоряки таҳсил, тирамоҳу зимистон ва баҳор якҳафтаӣ истироҳат хоҳанд кард.
Аз рӯи низомномаи нав, соли таҳсил 1-уми сентябр шурӯъ шуда, 7-уми июн ба анҷом мерасад ва баъди ин имтиҳонҳо оғоз меёбанд.
“Ҳоло мутахассисон ҳисоб карда истодаанд, ки имтиҳонҳо дар мактаб то кай идома хоҳанд кард ва рӯзи охири имтиҳонҳоро ҳам эълон мекунанд,” – гуфт ин масъули маорифи Суғд.
Қаблан соли хониш дар Тоҷикистон 1-уми сентябр сар шуда, 25-уми май занги охирин садо медод. Мақомоти маориф то 7-уми июн дароз шудани соли таҳсилро ба зиёд шудани соатҳои дарсии фанҳои дақиқ дар мактабҳои таҳсилоти умумии ҳамагонии кишвар рабт медиҳанд. Ин кор, ба гуфти сардори маорифи Суғд, ба хотири ба стандарти ҷаҳонӣ ҷавобгӯ намудани барномаи таълимии мактабҳои кишвар амалӣ шудааст.
Манбаъ: Тоҷикистонтаймс
Нет комментариев