Дар нуқтаҳои фурӯши сӯзишвории маркази маъмурии вилояти Суғд – шаҳри Хуҷанд гази моеъ бо нархи 7,10 сомонӣ ба фурӯш гузошта шудааст. Як ҳафта пеш нарх аз 7,20 то 7,30 сомонӣ буд.
Дар сӯҳбат бо хабарнигор масъулин қайд карданд, ки коҳиши тадриҷии нархҳо ба воридоти нави ин навъи сӯзишворӣ вобаста аст.
Дар ҳоли ҳозир арзиши гази моеъ 7,10 сомонӣ, бензини АИ92 10,90 сомонӣ ва сӯзишвории дизелӣ 11,00 сомонӣ мебошад. Як ҳафта пеш гази моеъ бо нархи 7,20 сомонӣ, бензини АИ92 11,40 сомонӣ ва сӯзишвории дизелӣ 11,70 сомонӣ фурӯхта мешуд.
Тибқи мушоҳидаҳои истеъмолкунандагон, қаблан нархи гази моеъ танҳо дар оғози корҳои кишоварзӣ ва анҷоми корҳои кишоварзӣ ночиз боло мерафт. Аммо имсол барои аввалин бор дар кишвар болоравии рекордии қимати гази моеъ – 9 сомонӣ барои як литр сабт шуд.
Ёдовар мешавем, ки дар Тоҷикистон, тибқи иттилои расмӣ, беш аз 60 дарсади мошинҳо истифода аз гази моеъро афзал медонанд. Болоравии нархи гази моеъ ба қимати ҳамлу нақли мусофирон таъсир расонид, нархи сафар дар манотиқи вилояти Суғд аз 25 то 50 дарсад боло рафт.
Аз рӯйи маводи “Sugdnews.com”
Нет комментариев