Бозии марказии даври 4-уми Чемпионати Тоҷикистон миёни дастаҳои Лигаи олӣ «Хуҷанд»-и Хуҷанд ва «Регар-ТадАЗ»-и Турсунзода дар варзишгоҳи «Спартак»-и шаҳри Хуҷанд баргузор гардид.
Тавре аз Федератсияи футболи Тоҷикистон ба хабарнигори АМИТ «Ховар» иттилоъ доданд, ин рақобати шадид бо ҳисоби 2:1 ба нафъи соҳибони майдон хотима ёфт. Аз ҳайати дастаи «Хуҷанд» голҳоро Ҷаҳонгир Эргашев ва Дилшод Бозоров ба ҳадаф расониданд. Ягона голи ҷавобиро ба дарвозаи хуҷандиҳо Саидамири Саидаҳмад ворид сохт.
Дар бозии дигари даври мазкур дастаи КМВА «Помир»-и Душанбе бар дастаи «Хатлон»-и Бохтар бо ҳисоби 2:1 ғолиб омад. Ду голи дастаи КМВА «Помир»-ро бозингари зархариди эронитабор Муҳаммад Алипур ба нишон расонид. Барои дастаи КМВА «Помир» ин аввалин ғалаба дар мавсими ҷории мусобиқоти Лигаи олии Тоҷикистон ба шумор меравад.
Бояд зикр кард, ки бо натиҷагирӣ аз 4 давр дар ҷадвали чемпионат ҳамоно дастаи «Хуҷанд» дар ҷои аввал аст. Дастаи «Истиқлол», ки як бозӣ кам анҷом додааст, бо фарқи як тӯб дар мақоми дуюм ҷой гирифтааст. Сегонаи аввалро КМВА «Помир» бо 6 хол ҷамъбаст мекунад.
Ёдовар мешавем, ки бозиҳои даври панҷум 13, 14 ва 17 апрел ба нақша гирифта шудааст. Дастаи футболи «Истиқлол» дар варзишгоҳи марказии шаҳри Ҳисор дастаи «Хуҷанд»-ро қабул мекунад. Дастаи «Хатлон» бо «Куктош» (13 апрел), «Регар-ТадАЗ» бо «Панҷшер» (14 апрел) ва «Барқчӣ» бо КМВА «Помир» (17 апрел) вориди майдон мешаванд.
Манбаъ: АМИТ «Ховар»
Нет комментариев