Мунтахаби олимпии «Тоҷикистон» (U-23) зери роҳбарии сармураббӣ Мубин Эргашев имрӯз, 28-уми октябр дар марҳилаи интихобии Ҷоми Осиё-2022 дар гурӯҳи “В” бозии дуюми худро бо тими олимпии «Непал» (U-23) доир кард.
Дидори дастаҳо дар варзишгоҳи марказии шаҳри Душанбе баргузор гардида, бо натиҷаи 6:0 ба нафъи мизбонон мунтахаби олимпии Тоҷикистон (U-23) ба фарҷом расид.
Шогирдони Мубин Эргашев ҳанӯз дар қисми аввали дидор лаҷоми бозиро ба даст гирифта, бо голҳои Шервонӣ Мабатшоев, Шарафҷон Солеҳов ва Рустам Соиров ба танаффус баромаданд. Дар пайти дуюми бозӣ миллипӯшони тоҷик боз се голи дигар ба дарвозаи тими олимпии Непал ба самар расониданд ва бо натиҷаи бузурги 6:0 шаҳди пирӯзӣ чашиданд.
Пас аз ғалаба тими олимпии Тоҷикистон бо касби 6 имтиёз садрнишини гурӯҳи «В» гардид ва рӯзи 31-уми октябр бо мунтахаби олимпии Эрон (U-23) соати 19:00 дар варзишгоҳи марказии шаҳри Душанбе бозии сеюмашро доир мекунад. Ёдовар мешавем, ки яккачини олимпии» Эрон (U-23) бо касби 6 имтиёз ва таносуби тӯбҳо дар зинаи дуюми ҷадвали гурӯҳи «В» маскан гирифтааст
Марҳилаи муқаддамотии Ҷоми Осиё-2022
Гурӯҳи»В» (бозии 2-юм)
«Тоҷикистон »(U-23 ) 6:0 «Непал» (U-23)
Голҳо: Шервонӣ Мабатшоев 24′, Шарафҷон Солеҳов 32′, Рустам Соиров 39′, Муҳаммадалӣ Азизбоев 61′, Ваҳдат Ҳанонов 68′ (пен.), Эмомалӣ Аҳмадҷон 72′.
Манбаъ: Варзиш-тв
Нет комментариев