Евгенний Ройзман, раиси шаҳри Екатеринбурги вилояти Свердловски, Федератсияи Россия пас аз иштирок дар расми оғози соли таҳсили нав дар яке аз мактабҳои ин шаҳр, ки дар он фарзандони бисёре аз муҳоҷирони тоҷик низ таҳсил мекунанд, навиштааст, «онҳо аз падаронашон дида беҳтар бо русӣ сӯҳбат мекунанд.»
Шаҳрдори Екатеринбург дар ин робита дар саҳифаи расмии худ дар шабакаи иҷтимоии «Facebook» пас аз иштирок дар расми оғози таҳсил дар мактаби 149-уми ин шаҳр навиштааст. Ройзман навиштааст, имсол ба фарқ аз солҳои гузашта, ки умдатан дар рӯзи оғози таҳсил аз литсейю гимназияҳо дидан мекард, тасмим гирифт ба мактабе равад, ки дар он ҷо 90 дарсади муҳассилин фарзандони муҳоҷирон — фарзандони муҳоҷирони тоҷик, узбак ва қирғиз ҳастанд.
Ройзман навиштааст, дар ин мактаб намояндагони 25 халқу миллатҳо таҳсил мекунанд, аммо муноқиша дар миёни онҳо дида намешавад. Дар идома шаҳрдор аз як муколамаи кӯтоҳаш бо як падари тоҷик навиштааст, ки писари калонаш аллакай дар ин мактаб таҳсил мекунад ва духтараш ба синфи якум меравад: «Тоҷик аз ман пурсид, бародар ту дар ин ҷо муаллими тарбияи ҷисмонӣ шуда кор мекунӣ? Ман посух додам, ҳисоб кун, ки ҳамин ҳамин хел аст.»
Дар аксҳое, ки хадамоти матбуоти шаҳрдори Екатеринбург нашр кардааст, Ройзман бо як куртаи оддӣ ва шими ҷинс бо муҳассилини ин мактаб сӯҳбат мекунад. Зоҳиран либосҳои хоксоронаи шаҳрдор боис шудааст, ки падари тоҷик, ки одат кардааст раисонро бо шиму костюми гаронбаҳо бубинад, шаҳрдорро муаллими тарбияи ҷисмонӣ гумон кунад.
Ройзман дар идома навиштааст, «бо ҳамаи тифлоне, ки синфи якум мераванд, салом кардам, номҳояшонро пурсидам. Ба зудӣ намефаҳмӣ номҳояшонро. Аз як писараке, ки хеле ҷиддӣ менамуд, номашро пурсидам, каме хиҷолат шуду гуфт Исроил! Ба ӯ гуфтам, ки беҳтарин номро дорӣ!”.
Дар фарҷоми навиштааш Ройзман гуфтааст ба волидони муҳассилин ин паёмро расонд, ки «агар онҳо ин шаҳрро дӯст доранд, шаҳр низ онҳоро дӯст хоҳад дошт”. Шаҳрдори Екатринбург дар хулосааш навиштааст, пас аз ин дидор мутмаин шудам, ки «инҳо аллакай фарзандони мо ҳастанд».
Шаҳри Екатеринбург ва вилояти Свердловск аз минтақаҳое ҳастанд, ки шумори муҳоҷирони тоҷик дар он ҷо зиёд аст. Танҳо тибқи нуфусшумории соли 2010 беш аз 111 ҳазор тоҷикон сокини муқими ин вилоят ҳастанд. Бисёре аз муҳоҷирони тоҷик пас аз чанд соли кору зиндагӣ оилаҳояшонро низ бо худ мебаранд ва ин аст, ки дар атрофи ин шаҳр якчанд маҳаллаҳои комилан тоҷикнишин ба вуҷуд омадааст.
Манбаъ: Сомонаи Тоҷикистон таймс
Нет комментариев