Бо иштироки Раиси шаҳри Хуҷанд Маъруф Муҳаммадзода дар минтақаи саноатии шимолу шарқии шаҳр бахшида ба 30 солагии Истиқлолияти давлатии Ҷумҳурии Тоҷикистон корхонаи навтаъсиси муштараки мурғпарварии ҶДММ «Суғд Самарқанд Парранда» мавриди баҳрабардорӣ қарор дода шуд.
Корхонаи муштараки мазкур дар доираи дастуру супоришҳои Асосгузори сулҳу Ваҳдати миллӣ, Пешвои миллат Президенти мамлакат муҳтарам Эмомалӣ Раҳмон ва дар сатҳи баланд роҳандозӣ гардидани муносибатҳои байнидавлатӣ бо ҷумҳурии дӯсту ҳамсоя Ӯзбекистон бо иқдоми соҳибкори самарқандӣ Заршед Муҳаммадиев ва соҳибкори маҳаллӣ Абдуаҳад Раҳимов бунёд гардида, баҳри истеҳсоли чӯҷаи бройлерӣ пешбинӣ гардидааст.
Иттилоъ дода шуд, ки ин коргоҳ дар марҳилаи аввал тухмҳоро аз шаҳри Самарқанд ворид намуда, бо таҷҳизоти муосир парвариши чӯҷаро ба роҳ мемонад. Иқтидори истеҳсолии моҳонаи чӯҷаи навъи бройлерӣ дар ин коргоҳ 100 ҳазор сарро ташкил медиҳад. Ҳамчунин ҶДММ «Суғд Самарқанд Парранда» истеҳсоли гӯшти мурғро низ ба роҳ мондааст, ки дар як моҳ то 100 тоннаро ташкил медиҳад. Чӯҷаҳо бо усули муосир парвариш ва нигоҳубин карда мешавад.
Корхона дар шаҳру навоҳии Исфара ва Мастчоҳ филиали хешро ифтитоҳ намуда, баҳри тавсеаи фаъолияти хеш нақшаҳои мушаххас дорад. Алҳол дар самти рушди корхона беш аз 100 ҳазор доллари амрикоӣ сармоя ҷалб гардида, то охири соли ҷорӣ он ба 500 ҳазор доллар расонида мешавад. Миқдори умумии кормандон бо назардошти филилалҳо ба зиёда аз 50 нафар расонида мешавад.
Раиси шаҳри Хуҷанд Маъруф Муҳаммадзода аз ин иқдоми роҳбарияти корхонаи навтаъсис истиқболи гарм намуда, омодагии хешро ҷиҳати фароҳам овардани шароити арзанда баҳри ташкили филиалҳои корхона дар гӯшаву канори шаҳр баён дошт.
Маъруф Муҳаммадзода гуфт, ки истеҳсол ва фурӯши гӯшти парҳезии мурғ ва талаботи он дар бозори дохилӣ бештар гардида, имкон дорад, ки корхона дар муддати кӯтоҳ ба муваффақиятҳо ноил гардад.
Машокир Назаров, директори КДФ «Паррандапарвар»-и Вазорати кишоварзии Ҷумҳурии Тоҷикистон изҳор дошт, ки маҳз бо дастгирии Роҳбарияти Давлату Ҳукумат баҳри воридоти технологияи истеҳсолотӣ ва ба роҳ мондани молҳои воридотивазкунанда имтиёзу дастгириҳои зиёд роҳандозӣ гардидааст.
Муассиси корхонаи мурғпарварии ҶДММ «Суғд Самарқанд Парранда» Заршед Муҳаммадиев изҳори омодагӣ намуд, ки бо вориди технологияи муосир ва зиёди намудани ҳаҷми истеҳсоли маҳсулот аз тамоми имконоти мавҷуда самаранок истифода хоҳад намуд.
Манбаъ: Дафтари матбуоти Раиси шаҳри Хуҷанд
Нет комментариев