Дар муассисаҳои тиббии вилояти Суғд бо дастгирии Мақомоти иҷроияи ҳокимияти давлатии вилоят вобаста ба пешгирии бемориҳои сироятӣ тадбирҳои мушаххас андешида шуда истодаанд. Мавриди зикр аст, ки дар имрӯз дар беморхонаҳои вилоят бемороне, ки аз илтиҳоби шуш ранҷ мебаранд кам нестанд. Хушбахтона, бо кӯмак ва талошҳои шабонарӯзии табибони соҳибтаҷриба ин беморон шифо ёфта истодаанд. Аз ҷумла санаи 6 – уми майи соли равон 10 нафар бемори шифоёфтае, ки тӯли ду ҳафта дар Беморхонаи касалиҳои сироятии шаҳри Хуҷанд аз бемории илтиҳоби шуш (пневмания) табобат мегирифтанд сиҳат шуда ба хонаашон баргаштанд. Ин нафарон асосан сокинони шаҳри Хуҷанд ва ноҳияи Бобоҷон Ғафуров мебошанд.
Бино ба иттилои иҷрокунандаи вазифаи Сардухтури беморхонаи мазкур Рустам Бӯрибоев ҳолати нафарони мураххасшуда хуб буда, пас аз ташхиси такрорӣ аз беморхона ҷавоб дода шуданд.
Мавсуф гуфт, ки алҳол дар Беморхонаи касалиҳои сироятии шаҳри Хуҷанд 94 нафар сокини шаҳру ноҳияҳои вилоят, ки бо бемории илтиҳоби шуш муроҷиат намуда буданд, дар ҳуҷраҳои хубу муҷаҳҳаз бо шароитҳои зарурӣ табобат гирифта истодаанд. Ҳолати ин нафарон низ хуб арзёбӣ мегардад.
Дастатон дардро набинад табибони ҳозиқ!
Манбаъ: SUGD.TJ
Нет комментариев