Ифтитоҳи толори варзишӣ дар ноҳияи Ҷаббор Расулов

0
3 387 просмотров

Бо иштироки Раиси вилояти Суғд Раҷаббой Аҳмадзода дар Ҷамоати деҳоти Сомониёни ноҳияи Ҷаббор Расулов толори варзишии замонавӣ мавриди истифода қарор гирифт.

Раиси вилоят Раҷаббой Аҳмадзода дар маросими ифтитоҳи толори варзишӣ бо ёдоварӣ аз раванди корҳои ободониву созандагӣ дар шаҳру ноҳияҳои вилоят иброз дошт, ки ҷиҳати иҷрои дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон то ҷашни 30-солагии Истиқлолияти давлатии Ҷумҳурии Тоҷикистон даҳҳо иншооти варзишӣ сохта хоҳад шуд. Таъкид карда шуд, ки бунёду баистифодадиҳии толору майдончаҳои варзишӣ барои ҷалби ҷавонону наврасон ба варзиш ва ҳамин тариқ нигаҳдории солимии ҷомеа амри муфиду саривақтӣ мебошад.

Толори варзишии навбунёд барои омӯзиши навъҳои гуногуни гӯштин пешбинӣ гардида, он аз ҷониби соҳибкор Шоҳин Гулов бо харҷи 1,2 миллион сомонӣ бунёд шудааст. Толор дорои 200 ҷойи нишаст буда, дар он ҳамчунин барои гузаронидани мусобиқаҳо шароитҳои зарурӣ мавҷуд мебошад.

Тибқи иттилои Маъбуд Маъруфзода, сардори бахши кор бо ҷавонон ва варзиши ноҳияи Ҷаббор Расулов бо дастгирии мақомоти давлатӣ ва саҳмгузории соҳибкорону фаъолон аз аввали сол дар ноҳия 5 майдончаи варзишӣ ва ҳамакнун 1 толори варзишӣ мавриди баҳрабардорӣ қарор гирифтааст. Маҳз мавҷудияти иншооти муосири варзишӣ ва имкониятҳои машқу тамрин боис шуда, ки варзишгарони ноҳия дар мусобиқаҳои гуногунсатҳ иштирок намуда, ба дастовардҳои назаррас ноил гарданд. Аз ҷумла, варзишгарони ноҳия аз аввали сол дар мусобиқаҳои вилоятӣ соҳиби 184 медали тилло, 133 медали нуқра, 161 медали биринҷӣ, ҷумҳуриявӣ 54 медали тилло, 43 медали нуқра, 64 медали биринҷӣ ва дар мусобиқаҳои байналмилалӣ соҳиби 1 медали нуқра ва 5 медали биринҷӣ гардидаанд.

Худи ҳамин рӯз Раиси вилоят рафти мусобиқаи ҷумҳуриявӣ оид ба гӯштини камарбандиро, ки дар толори навбунёд оғоз ёфт, мавриди таваҷҷуҳ қарор дода, ба ғолибони мусобиқа дар вазнҳои 57 кг, 90 кг ва 100 кг медалу туҳфаҳо тақдим кард.

Мусобиқаи ҷумҳуриявӣ бо иштироки 170 варзишгар аз шаҳру ноҳияҳои вилояти Суғд, шаҳри Душанбе, вилояти Хатлон ва шаҳру ноҳияҳои тобеи ҷумҳурӣ ҷараён дорад.

Манбаъ: Хадамоти матбуоти Раиси вилояти Суғд

Нет комментариев

Также рекомендуем

Сообщить об опечатке

Текст, который будет отправлен нашим редакторам: