Дар идомаи чорабиниҳо ба муносибати Рӯзи ҷавонони Тоҷикистон имрӯз дар Театри мазҳакаи мусиқии ба номи Камоли Хуҷандии маркази вилоят мулоқоти Раиси вилоят Раҷаббой Аҳмадзода бо донишҷӯён ва устодони Муассисаи давлатии таълимии Коллеҷи тиббии шаҳри Хуҷанд ба номи Юсуфхон Исҳоқӣ доир гардид.
Зимни суханронии хеш Раҷаббой Аҳмадзода кулли донишҷӯён ва устодони МДТ Коллеҷи тиббии шаҳри Хуҷанд ба номи Юсуфхон Исҳоқиро ба муносибати Рӯзи ҷавонони Тоҷикистон табрик намуда, сипас дар бораи муваффақият ва дастовардҳои Муассисаи давлатии таълимӣ изҳори андеша намуд.
— Боиси ифтихор аст, ки бо дастгирии Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон дар замони соҳибистиқлолии мамлакат доир ба дастгирии ҷавонон тадбирҳои ҳадафманд андешида шуда, ба ин қишри ҷомеа таваҷҷуҳи хоса зоҳир мегардад. Дар соли хониши 2017-2018 МДТ Коллеҷи тиббии шаҳри Хуҷанд ба номи Юсуфхон Исҳоқиро 1185 нафар бо тахассусҳои гуногун, аз ҷумла 29 нафар бо дипломи аъло хатм карда, дониши хешро дар донишгоҳҳои олӣ тақвият бахшида истодаанд. Бо вуҷуди он ки аксари хатмкунандагон бо ҷойи корӣ таъмин гардидаанд, то ҳол ин масъала боиси нигаронӣ қарор дорад.
Раиси вилоят дар бораи муваффақиятҳои донишҷӯёни МДТ Коллеҷи тиббии шаҳри Хуҷанд ба номи Юсуфхон Исҳоқӣ зикр дошт, ки боиси ифтихор аст, ки якчанд нафар муҳассилини ин боргоҳи таълимӣ дар олимпиадаҳои мухталифи ҷумҳуриявӣ ширкат варзида, ҷойҳои намоёнро соҳиб гардидаанд.
Боиси шодмонист, ки устодон ва донишҷӯёни муассисаи таълимӣ сиёсати хирадмандонаи Пешвои миллат муҳтарам Эмомалӣ Раҳмонро ҳамаҷониба дастгирӣ менамоянд. Маъмурияти муассисаи таълимӣ на танҳо дар баланд бардоштани донишу малакаи донишҷӯён, инчунин барои боз ҳам беҳтар намудани шароити таълиму тадрис кӯшиш ба харҷ медиҳанд. Бо ин мақсад дар назди муассисаи таълимӣ майдончаи варзишӣ таъсис дода, хобгоҳ ва ошхона таъмиру тармим, инчунин гармхона низ бунёд карда, дар он маҳсулоти сабзавот ва гул парвариш намуда истодаанд.
Раиси вилоят оид ба иқдомҳои шоистаи Президенти мамлакат дар бораи дастгирии ятимону бепарасторон ибрози андеша намуда, зикр дошт, ки дар МДТ Коллеҷи тиббии шаҳри Хуҷанд ба номи Юсуфхон Исҳоқӣ 19 нафар ятимони кул, ки аз он 17 нафарашон духтарон мебошанд, бо хобгоҳ, идрорпулӣ ва хӯроки яквақта таъмин буда, инчунин дар иду айём бо туҳфаҳои хотиравӣ тақдиронида мешаванд.
— Мақомоти иҷроияи ҳокимияти давлатии вилоят, — қайд кард Раиси вилоят, — пайваста кӯшиш менамояд, ки шароити таълиму тадрисро дар муассисаҳои таълимӣ беҳтар созем ва таъсис ёфтани стипендияи Президенти мамлакат ва Раиси вилоят барои донишҷӯён, магистрантон ва аспирантони муассисаҳои олӣ ва миёнаи махсус, квота, ҷорӣ кардани омӯзиши забонҳои хориҷӣ, азхудкунии компутер ва ғайраҳо яке аз тадбирҳои дурбинонаи Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон мебошад. Пас аз чунин дастгириҳо ва муҳайё сохтани шароти таҳсил устодон ва омӯзгоронро лозим аст, ки унвонҷӯёни боистеъдодро таълиму тарбия намоед, то ин ки Тоҷикистонро дар сатҳи байналмилалӣ муаррифӣ карда тавонанд.
Дар анҷом кулли донишҷӯён ва устодони МДТ Коллеҷи тиббии шаҳри Хуҷанд ба номи Юсуфхон Исҳоқиро бо Рӯзи ҷавонони Тоҷикистон муборакбод намуда, ба онҳо хониши аъло орзу намуд.
Сипас, Раиси вилоят Раҷаббой Аҳмадзода ба донишҷӯёни муваффақ мукофотпулӣ супорид.
Дар муколамаи озод, ки байни донишҷӯён ва Раиси вилоят доир гардид, донишҷӯён аз чунин шароити мусоид барои таҳсил ба Пешвои муаззами миллат ва Мақомоти иҷроияи ҳокимияти давлатии вилоят арзи сипос намуда, оид ба ташкил кардани хатсайр байни микроноҳияи ҳаштум ва кӯчаи ба номи Фирдавсӣ, мумфаршкунии роҳ ва дигар таклифу дархости хешро баён карданд.
Мулоқот бо суруду тарона дар иҷрои донишҷӯёни МДТ Коллеҷи тиббии шаҳри Хуҷанд ба охир расид.
Манбаъ: Хадамоти матбуоти Раиси вилояти Суғд
Нет комментариев