Дар шаҳри Теҳрон бо ташаббуси Вазорати корҳои хориҷии Ҷумҳурии Исломии Эрон конфронси байналмилалӣ таҳти унвони “Ҷаҳон алайҳи хушунат ва ифротгароӣ” баргузор гардид, ки дар кори он намояндагони баландпояи доираҳои сиёсӣ ва таҳқиқии беш аз 50 кишвари ҷаҳон ширкат варзиданд. Ҷумҳурии Тоҷикистонро дар ин ҳамоиши байналмилалӣ Муовини вазири корҳои хориҷӣ Низомиддин Зоҳидӣ намояндагӣ кард. Конфронс бо сухани муқаддимавии Вазири умури хориҷаи Ҷумҳурии Исломии Эрон Муҳаммад Ҷаводи Зариф оғоз гардид ва сипас Раиси Ҷумҳурии Исломии Эрон доктор Ҳасани Руҳонӣ доир ба вазъи хушунату ифротгароӣ дар ҷаҳони имрӯз ва роҳҳалҳои муносиб ҷиҳати решакан кардани ин чолишу таҳдидҳо ба субот ва амнияти минтақа ва ҷаҳон, маърӯзаи фарогир намуд. Ҳасани Руҳонӣ аз номи Ҷумҳурии Исломии Эрон ба ҳайси кишваре, ки бо ибтикори он Қатъномаи Маҷмаи Умумии СММ бо номи “Ҷаҳон алайҳи хушунат ва ифротгароӣ” дар таърихи 18 декабри соли 2013 қабул шудааст, пешниҳод намуд, ки ин сана Рӯзи ҷаҳонии мубориза алайҳи хушунат ва ифротгароӣ эълон гардад. Дар интиҳои конфронси байналмилалии “Ҷаҳон алайҳи хушунат ва ифротгароӣ” Баёния қабул гардид, ки дар он зарурати ҳамкории кишварҳо дар мубориза бо хушунату ифротгароӣ таъкид шуда, пешниҳодҳои мушаххас ҷиҳати пешгирӣ аз ин хатарҳои глобалӣ эълом шудаанд. Дар ҳошияи ин конфронс мулоқотҳои Муовини вазири корҳои хориҷии Ҷумҳурии Тоҷикистон Низомиддин Зоҳидӣ бо Вазири корҳои хориҷии Ҷумҳурии Исломии Эрон Муҳаммад Ҷаводи Зариф ва Муовини ӯ Иброҳими Раҳимпур баргузор шуданд. Дар мулоқотҳо вазъи кунунӣ ва дурнамои муносибатҳои дуҷонибаи Тоҷикистон ва Эрон мавриди табодули назар қарор гирифт. Ҷонибҳо натиҷаҳои сафари Президенти Ҷумҳурии Исломии Эрон Ҳасани Руҳониро ба Ҷумҳурии Тоҷикистон дар рушди минбаъдаи муносибатҳои ду кишвар баланд арзёбӣ намуда, изҳори боварӣ карданд, ки барои татбиқи лоиҳаҳои зербиноӣ дар Тоҷикистон ҳамкории мутақобилан судманду густурда роҳандозӣ карда мешавад.
Дар ин бора jahonnamo.tj хабар медиҳад.
Нет комментариев