Аз 16 то 20 октябри соли равон дар шаҳри Душанбе ҳаштумин Кинофестивали байналмилалии “Дидор” баргузор мегардад, ки он ба бузургдошти кинематографисти барҷастаи тоҷик Тоҳир Собиров бахшида мешавад.
Сафар Ҳақдодов, раиси Иттифоқи кинематографистони Тоҷикистон ва директори кинофестивал мегӯяд, барои ширкат дар бахшҳои гуногуни ҷашнвора наздики 100 филм пешниҳод шуда буд, ки аз он 70 филм барои барномаҳои гуногун интихоб шудаанд.
“Дар баробари давлатҳои анъанавӣ, ки солҳои қаблӣ низ дар синамобазми мо ширкат мекарданд, соли равон аз кишварҳои Аврупои Шарқӣ – Литва, Эстония, Латвия, Беларус ва Украина низ хоҳиши ширкат варзиданро карданд. Гарчанде мо барои даъвати филмсозон аз ин кишварҳо маблағ надорем, иҷозати онҳоро гирифтем, то ки филмҳояшон дар озмуни байналмилалӣ ва дигар бахшҳо иштирок кунанд.”- мегӯяд, номбурда.
Ҳамчунин, ба гуфти баргузоркунандагони “Дидор” соли равон филмҳои дарозметраж аз кишварҳои анъанавии иштирокчӣ, аз қабили мамолики Осиёи Марказӣ, Русия, Қафқоз, Муғулистон, Эрон ва Афғонистон ширкат хоҳанд кард.
Вежагии Кинофестивали байналмилалии “Дидор” дар барномаҳои махсуси он, аз қабили “Фокус”, “Панорама” ва “Синамои кишварҳои форсизабон” мебошад, ки филмҳои ҷолибро дар бар мегирад.
“Имсол як барномаи вижаи «Ҳамсояҳои хеле наздик»-ро роҳандозӣ кардаем, ки дар он 3-4 филмҳои гуногун аз Қазоқистон, Қирғизистон ва Ӯзбекистон намоиш дода мешаванд. Ҳоло раванди мувофиқа кардани барнома бо ҳамсоякишварҳо идома дорад”,- мегӯяд Сафар Ҳақдодов.
Ҳамчунин, соли равон ба гуфти масъулин 9 филм барои озмуни байналмилалии филмҳои баланд (дарозметраж), 12 филм – барои озмуни байналмилалии филмҳои кӯтоҳ (кӯтоҳметраж) ва боқимонда барои барномаҳои дигар ширкат хоҳанд кард.
“Фарқияти “Дидор”-и имсола майдони васеъ додан ба филми ҷавонон мебошад.
Соли равон ҳудуди 80 дарсади филмҳои интихобшуда ба филмсозони ҷавони кишварҳои Осиёи Марказӣ ва Афғонистон тааллуқ доранд. Ҳамчунин, барои филмофарони ҷавони Тоҷикистон як мусобиқаи алоҳидаи миллӣ низ таъсис додаем, ки ҷоизааш дар сатҳи байналмилалӣ мебошад. Илова бар ин дар охири синамобазм як мизи мудавварро барои филмофарони ҷавон дар назар дорем. Дар он бурду бохти филмофарони ҷавон аз ҷониби мутахассисони соҳа баррасӣ мегардад. Кори пажӯҳишии фестивал низ ҳамин аст, ки равияҳо ва равандҳои гуногуни синамоиро муайян бикунем”,- мегӯяд Сафар Ҳақдод.
Муҳокима ва баҳогузорӣ ба филмҳо дар “Дидор” дар ду бахш – озмуни филмҳои байналмилалӣ ва миллӣ сурат мегирад.
Озмуни байналмилалиро доварон дар ҳайати Питер Скарлет (ИМА), Ашимова Диана (Қазоқистон), Дениель Цюст (Шветсария) арзёбӣ мекунанд. Ба ҳайати ҳакамони “Озмуни филмҳои миллӣ” Манзура Ӯлҷабоева (Тоҷикистон), Ҳасан Қарибӣ (Эрон), Бахтиёр Қаҳҳоров (Тоҷикистон) шомиланд.
Сафар Ҳақдодов мегӯяд, ки соли равон Кинофестивали “Дидор” бо намоиши филмҳои ҳунарӣ маҳдуд шуда, дар соли 2019 баргузории як кинофестивали филмҳои мустанад ба назар гирифта шудааст.
“Соли оянда мо як кинофестивали дигарро бо номи “Дидори ростин” ба назар гирифтаем, ки дар он танҳо филмҳои мустанад ширкат хоҳанд кард. Ба ин васила Тоҷикистон боз соҳиби як Синамобазми байналмилалии дигар – “Дидори ростин” хоҳад шуд”,-афзуд номбурда.
Мавриди зикр аст, ки бо пешниҳоди ҳафтаномаи “Тоҷикистон” дастандаркорони “Дидор” режиссёри бузурги тоҷик Маргарита Қосимоваро аз Минск ба Душанбе даъват карданд.
Ёдовар мешавем, ки Кинофестивали байналмилалии “Дидор” ҳар ду сол як маротиба моҳи октябр дар шаҳри Душанбе баргузор мешавад. Мухлисони кино метавонанд аз 16 то 20-уми октябр дар кинотеатри “Зебунисо” ( воқеъ дар минтақаи ДОК, ш. Душанбе, хиёбони С. Айнӣ 131) аз дастовардҳои навтарини кинои тоҷик ва ҷаҳон огоҳ шаванд. Даромад ба кинотеатр дар давраи баргузории ҷашнвора ройгон аст.
Нет комментариев